İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 420 Hüküm no: 319 Orijinal metin no: [100b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep Muhassılı Ali Ağa b. Abdurrahman’ın Mihaliç’deki çiftliğini Ali Ağa b. Ahmed’e sattığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘den fahrü’l-müderrisîn İbrahim Efendi b. Mehmed el-Hamîdî irsâl olunup ol dahi mahmiye-i İstanbul’da Zeyrek mahallesinde vâki‘ umdetü’l-emâcid ve’l-ekârim câmi‘u’l-mehâmid ve’l-mekârim Haleb Muhassılı olan Ali Ağa b. Abdurrahman’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i Nebevî eyledikde mûmâ-ileyh Ali Ağa meclis-i ma‘kūd-ı mezbûrda hazînedârı olup sâbıkā medîne-i İzmir gümrükçüsü olan fahrü’l-eşbâh ve’l-ekfâ Ali Ağa b. Ahmed mahzarında ikrâr-ı tâm ve takrîr-i kelâm edip silk-i mülkümde münselik olup vilâyet-i Anadolu’da Mihaliç kazâsına tâbi‘ Kızıllar nâm karyede vâki‘ Kızıllar demekle ma‘rûf lede’l-ahâlî ve’l-cîrân ma‘lûmü’l-hudûd hâriciye ve dâhiliyede büyût-i adîde ve ambar ve ahur ve dâhiliyede bir kıt‘a bağı ve kenîf ve havluyu müştemil çiftlik ta‘bîr olunur menzilimi ve yedine verdiğim defter mûcebince içinde mevcûd çiftlik âlâtını cemî‘-i tevâbi‘ ve levâhıkı ile tarafeynden îcâb ve kabûlü hâvî bey‘-i kat‘î ile mezbûr Ali Ağa’ya beş yüz guruşa bey‘ ve temlîk ve teslîm ve yine çiftlik-i mezbûr ile zirâ‘at olunan taht-ı tasarrufumda olan tahmînen bin keyl tohum isti‘âb eder lede’l-ahâlî ve’l-cîrân ma‘lûmü’l-hudûd ve’l-kıt‘a tarlalarımı bâ-izn-i sahib-i arz bin guruş bedel mukābelesinde ferâğ ve tefvîz ol dahi ber-vech-i muharrer iştirâ ve temellük ve tefevvüz ve kabûl ve her birini mahallerinde kabza teslît etdiğimden sonra semeni olan meblağ-ı mezbûr beş yüz guruş ile bedel-i ferâğ olan bin beş yüz guruş ki cem‘an mezbûr Ali Ağa yedinden bi’t-tamam ve’l-kemâl ahz u kabz eyledim ba‘de’l-yevm çiftlik-i mezbûrda ve arâzi-i mezkûrede kat‘â alâkam kalmayıp mezbûr Ali Ağa’nın mülk-i müşterâsı ve hakk-ı müfevvezi olmuşdur keyfe mâ yeşâ mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mehmed b. Mehmed ve Mustafa b. Şaban ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: Fahrü’l-eşbâh İbrahim Ağa b. Muslu, diğer İbrahim Ağa b. Mahmud, Küçük Emir demekle ma‘rûf es-Seyyid Ahmed Çelebi, Ömer Çelebi b. Ebûbekir, Hazînedâr Ali Ağa, Hüseyin Beşe b. Mehmed, Mehmed Ağa b. Ali, es-Seyyid Ali Efendi b. Mustafa.