İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 421 Hüküm no: 320 Orijinal metin no: [100b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halep muhassılı Ali Ağa b. Abdurrahman’ın tasarrufunda bulunan vakıf menzili Ali Ağa b. Ahmed’e sattığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî mahmiye-i İstanbul’da Zeyrek mahallesinde vâki‘ Haleb Muhassılı olan umdetü’l-emâcid ve’l-ekârim câmi‘u’l-mehâmid ve’l-mekârim Ali Ağa b. Abdurrahman nâm kimesnenin menziline varıp zeyl-i kitâbta muharrerü’l-esâmî Müslimîn huzûrlarında akd-i meclis-i şer‘-i Nebevî eyledikde mûmâ-ileyh Ali Ağa meclis-i ma‘kūd-ı mezbûrda hazînedârı olup sâbıkā medîne-i İzmir gümrükçüsü olan fahrü’l-eşbâh ve’l-ekfâ Ali Ağa b. Ahmed mahzarında ikrâr-ı tâm ve takrîr-i kelâm edip arsasının senede Ayasofya-i kebîr evkāfına yedi yüz akçe mukāta‘a-i kadîmesi olup binâsı silk-i mülkümde münselik olan mahalle-i mezbûrede vâki‘ hudûd-ı erba‘asında bir tarafı selâmlık kapısından harem kapısına varınca zâviye ve câmi‘-i şerîf ve bir tarafı ba‘zen Hâce Hatun menzili ve ba‘zen Pîrî Paşa imâmı Ahmed Efendi menzili ve bir tarafı Demir Han mahallesinde tarîk-i âm ve ba‘zen Mahmud Çelebi menzili ve ba‘zen İvaz Reis menzili ve Mehmed Beşe menzili ve Pîrî Paşa mescid-i şerîfi çeşmeleri ve Müezzin ve Kâğıdcı Abdurrahman ve Dülger Hasan ve el-Hâc Ahmed ve Pehlivan ve Canbaz Mirza menâzili ve dükkânları ve ba‘zen Muslu Beşe menzili ve dükkânı ve mahalle-i mezbûre parmak kapısı ve tarîk-i âm ile mahdûd ve mümtâz hâriciyede sagīr ve kebîr tahtânî on bâb cedîd oda ve dîvânhâne ve kahve odası ve kilâr ve eşcâr-ı müsmire ve gayr-ı müsmireli iki kebîr bahçe ve mahzen ve fevkānî altı bâb oda ve bir kebîr dehliz ve ahur-ı kebîr ve sofa ve dört bâb kenîf ve kapıcı odası ve havlu-yı kebîr ve kanavât-ı müsennât ile muharrer mâ’-i cârî ve matbah-ı kebîr ve mahtab ve su kuyusu ve câmi‘-i şerîfe muttasıl harem kapısına varınca taş duvar ve sundurma sakfı ve dâhiliyede münakkaş ve müzehheb fevkānî beş bâb oda ve bir kebîr sofa ve bir çeşme ve bir kaşlı kebîr oda ve üç halvetî ve hamam ve kenîf ve fevkānî külhan ve iki bâb kebîr taş oda ve kayganlı bir sofa ve vüstâda altı bâb oda ve tahtânî beş bâb oda ve bir taş oda ve bir mahzen ve bir kebîr matbah ve bir fırın ve iki musluk ve bir sagīr matbah ve üç kenîf ve bir su kuyusu ve bahçe ve def‘a bir su kuyusu ve iki köşk ve üç tekneli câmeşûyhâne ve meydân ve havlu ve hâriciye ve dâhiliyede vâki‘ yedi buçuk masûra mâ-i lezîz-i cârîyi müştemil menzilimi cemî‘-i tevâbi‘ ve levâhıkı ve kâffe-i hukūk ve merâfıkı ile tarafeynden îcâb ve kabûlü hâvî bey‘-i kat‘î ile mezbûr Ali Ağa’ya yirmi beş bin guruşa bey‘ ve temlîk ol dahi ber-vech-i muharrer iştirâ ve temellük ve tesellüm ve kabûl ve arsasını dahi bâ-izn-i mütevellî meccânen ferâğ ve tefvîz ol dahi [101a] tefevvüz ve kabûl etdiğinden sonra semeni olan meblağ-ı mezbûr yirmi beş bin guruşu mezbûr Ali Ağa yedinden bi’t-tamam ahz u kabz eyledim ba‘de’l-yevm menzil-i mahdûd-ı mezbûrda benim alâkam kalmayıp mezbûrun mülk-i müşterâsı ve hakk-ı müfevvezi olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr İbrahim Efendi mahâllinde ketb ve tahrîr ba‘dehû ma‘an irsâl olunan Mehmed b. Mehmed ve Mustafa b. Şaban ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: Küçük Emir demekle şehîr es-Seyyid Ahmed Çelebi, Telhîsî İbrahim Ağa b. Mahmud, diğer İbrahim Ağa b. Muslu, fahrü’l-eşbâh es-Seyyid Ali Efendi b. Mustafa, Ömer Çelebi b. Ebûbekir, Hüseyin Beşe b. Mehmed, Mehmed Ağa b. Ali, hâlâ mûmâ-ileyh Ali Ağa’nın hazînedârı fahrü’l-eşbâh Ali Ağa.