İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 422 Hüküm no: 321 Orijinal metin no: [101a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Abdurrahman’ın isim ve adedlerini belirttiği ev, tarla, eşya ve hayvanlarını karısı Emine Hanım’a sattığı Husûs-ı âti’z-zikrin mahâllinde ketb ve tahrîri iltimâs olunmağın savb-ı şer‘den irsâl olunan İbrahim Efendi b. Mehmed el-Hamîdî mahmiye-i İstanbul’da Zeyrek mahallesinde vâki‘ umdetü’l-emâcid ve’l-ekârim câmi‘u’l-mehâmid ve’l-mekârim Haleb muhassılı olan Ali Ağa b. Abdurrahman’ın menziline varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i Nebevî eyledikde mûmâ-ileyh Ali Ağa meclis-i ma‘kūd-ı mezbûrda hâlâ zevce-i menkûhası fahrü’l-muhadderât Emine Hanım bt. el-merhûm Mehmed Paşa tarafından husûs-ı âti’l-beyâna vekîl-i şer‘îsi olan sâbıkā İzmir gümrükçüsü olan fahrü’l-eşbâh Ali Ağa b. Ahmed mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup medîne-i Manisa muzâfâtından Palamut nâhiyesine tâbi‘ Hartıllı nâm karyede vâki‘ lede’l-ahâlî ve’l-cîrân ma‘lûmü’l-hudûd dâhiliye ve hâriciyede büyût-ı adîde ve ambar ve havlu ve ahuru müştemil çiftlik ta‘bîr olunur menzilimi ve içinde mevcûd on iki re’s luk ve tülü develerimi ve yüz elli aded koyun ve kuzu ve kırk re’s kara sığır ve su sığırı ve kebîr bahçe ve âlat-ı lâzımemi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i kat‘î ile bi safkatin vâhidetin bin beş yüz guruşa zevcem mezbûre Emine Hanım’a bey‘ ve temlîk ve yine karye-i mezbûre sınırı dâhilinde lede’l-ahâlî ve’l-cîrân ma‘lûmü’l-hudûd ve’l-kıt‘a bin keyl tohum istî‘ab eder tarlalarımı dahi iki bin guruş bedel mukābelesinde bâ-izn-i sahib-i arz mezbûre Emine Hanım’a ferâğ ve tefvîz ol dahi ber-vech-i muharrer iştirâ ve temellük ve tefevvüz ve kabûl ve mahallerinde kabza teslît etdiğimden sonra semenleri olan bin beş yüz guruş ile bedel-i mezkûr iki bin guruş ki cem‘an üç bin beş yüz guruş mukābelesinde mezbûre Emine’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm eşyâ-i muharrere-i mezbûrede kat‘â alâkam kalmayıp mezbûrenin mülk-i müşterâsı ve hakk-ı müfevvezi olmuştur keyfe mâ teşâ mutasarrife olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde ketb ve tahrîr, ba‘dehû ma‘an irsâl olunan Mehmed b. Mehmed ve Mustafa b. Şaban ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-ışrîn min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: İbrahim Ağa b. Mahmud, diğer İbrahim Ağa b. Muslu, Küçük Emir demekle ma‘rûf es-Seyyid Ahmed Çelebi, fahrü’l-eşbâh es-Seyyid Ali Çelebi b. Mustafa, Ömer Çelebi b. Ebûbekir, Hüseyin Beşe b. Mehmed, Mehmed Ağa b. Ali, Hazînedâr Ali Ağa.