İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 423 Hüküm no: 322 Orijinal metin no: [101a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin Nureddin Vakfı’na ait olup çıkan yangında muhterik olan menzilin yeniden inşasında yapılan masrafların tesbiti Husûs-ı âti’l-beyânın mahâllinde ketb ve tahrîri içün sâdır olan fermân-ı âlîye imtisâlen savb-ı şer‘-i âlîden keşif nâibimiz olan fahrü’l-müderrisîn Mevlânâ Abdullah Efendi b. Ali irsâl olunup ol dahi hâssa mi‘mâr lardan Üstâd Dede Mehmed Halîfe b. İshak ve Ali Halîfe b. Abdullah ile mahmiye-i İstanbul’da merhûm ve mağfûrun-leh Şehzâde Sultân Mehmed Han Câmi‘-i şerîfi kurbünde Emin Nureddin mahallesinde vâki‘ zikr-i âtî menzile varıp zeyl-i kitâbda muharrerü’l-esâmî Müslimîn mahzarlarında akd-i meclis-i şer‘-i mübîn eyledikde merhûm-ı mezbûr Emin Nureddin Mescid-i şerîfinde müezzin olan Ali Halîfe b. Mustafa nâm kimesnenin kāimmakāmı ve vekîl-i müsecceli olan Hüseyin Halîfe b. Ali nâm kimesne meclis-i ma‘kūd-ı mezbûrda merhûm-ı mezbûr Emin Nureddin Vakfı’nın bi’l-fi‘il mütevellîsi olan el-Hâc Abdurrahim Ağa b. Abdullah’ın kezâlik vekîl-i müsecceli Mehmed Çelebi b. Mehmed ile vakf-ı mezbûrun nâzırı olan es-Seyyid Mehmed Efendi b. Ahmed Efendi hazır oldukları hâlde takrîr-i kelâm ve ta‘bîr-i merâm edip merhûm-ı mezbûrun mescid-i şerîfinde müezzin olanlara meşrûta vakfı olup işbu bir tarafdan kezâlik merhûm-ı mezbûrun imama meşrûta vakfı olan menzil ve bir tarafdan Abdurrahman Bey’in menzili ve bir tarafdan Rukiye nâm hatun tasarrufunda olan menzil ve bir tarafdan tarîk-i hâss ile mahdûd menzil bin yüz beş senesi Muharremi’nde vâki‘ olan harîkde bi’l-külliye muhterik olup arsa-i sırfe kalıp ve cânib-i vakf-ı mezbûrda müceddeden binâ ve imâretine müsâ‘ade olmamağla vakf-ı mezbûrun mesârif-i mühimme-i lâzıme vezâyifinden fazla hâsıla oldukda vakf-ı [101b] merkūma bi-şarti’r-rücû‘ kendi malımdan izn-i mütevellî-i mezbûr ve yedimde olan hüccet nâtıka olduğu üzere arsa-i mahdûde-i mezkûre üzerine bundan akdem bi’l-izni’ş-şer‘î iki bâb fevkānî oda ve tahtânî bir kilâr ve bir matbah binâ ve ihdâs etmişimdir hâlâ keşf ve misâha olunup mertebe-i tahammül-i kıymeti tahmîn-i sahîh ile tahmîn ve takvîm olunmak matlûbumdur dedikde gıbbe’t-tasdîkı’l-mu‘teber mi‘mârân-ı mezbûrân mütevellî vekîli mezbûr Mehmed Çelebi ve nâzır-ı merkūm muvâcehelerinde müştemilât-ı merkūmenin ebniye-i meşrûtasını misâha ve tahmîn eylediklerinde tûlen ve arzen bi-hesâbı terbi‘i yüz seksen yedi zirâ‘-ı cedîd sakf zirâ‘ı kırkar akçeden yedi bin dört yüz seksen akçe ve bi-hesâb-ı mezbûr yüz iki zirâ‘ çam tahtasından beyaz tavan zirâ‘ı otuzar akçeden üç bin altmış akçe ve bi-hesâb-ı mezbûr yüz iki zirâ‘ tahta döşeme zirâ‘ı otuzar akçeden üç bin beş yüz yetmiş akçe ve izzi kanatlı iki aded zemîn masandıra her biri sekizer yüz akçeden bin altı yüz akçe ve izzi kanatlı beş aded dolabın her biri üçer yüz akçeden bin beş yüz akçe ve izzi kanatlı sekiz aded pencerenin her biri ikişer yüz elli akçeden iki bin akçe ve bi-hesâbı mezbûr seksen dört zirâ‘ iki kat sıvalı dolma duvar zirâ‘ı otuzar akçeden beş bin beş yüz yirmi akçe ve beş buçuk çift cam duvarın her biri yüz ellişer akçeden sekiz yüz yirmi beş akçe ve bir aded ocak ber-vech-i tahmîn altı yüz akçe ve on beş aded kulübenin her biri kırkar akçeden altı yüz akçe ve izzi kanatlı iki aded kemer kapının her biri üçer yüz akçeden altı yüz akçe ve bir aded medîne dolabı ber-vech-i tahmîn yüz akçe ve tahta baranlı üstü kaplama on beş basamak bir aded cunba nerdübânı ber-vech-i tahmîn bin akçe ve bi-hesâbı mezbûr elli zirâ‘ tahta perdenin zirâ‘ı yirmişer akçeden bin akçe ve bir aded dehliz direği altmış akçe ve bir aded tavan altmış akçe ve tahtânîde bir aded yük yeri ber-vech-i tahmîn üç yüz akçe ve bi-hesâbı mezbûr otuz zirâ‘ tahta döşemenin zirâ‘ı otuzar akçeden dokuz yüz akçe ve iki aded sagīr demir pencere ma‘a cam her biri yüz ellişer akçeden altı yüz akçe ve iki aded sâde kapının her biri yüz ellişer akçeden üç yüz akçe ve bir aded kemerli matbah ocağı ber-vech-i tahmîn sekiz yüz akçe ve bi-hesâbı mezbûr yüz yirmi bir zirâ‘ dolma duvarın zirâ‘ı otuzar akçeden üç bin altı yüz otuz akçeye ve tahtânîde bir aded topaç direk ma‘a başlık ve kürsî iki yüz akçeye ve bir aded taban ber-vech-i tahmîn iki yüz akçe ve bir kenîf ma‘a kâriz ber-vech-i tahmîn dört yüz akçe ve bi-hesâbı mezbûr altmış zirâ‘ taş duvarın zirâ‘ı yetmiş akçeden on bir bin iki yüz akçe ve bi-hesâbı mezbûr kırk zirâ‘ sakf duvar zirâ‘ı yirmişer akçeden sekiz yüz akçe ve izzi kanatlı mükemmel bir aded sokak kapısı bin akçe ki; min-haysü’l-mecmû‘ ebniye-i meşrûha elli bin dört yüz seksen beş akçe ile ancak olur bundan noksan ile olmak mümkün değildir deyü mi‘mârân-ı mezbûrân ile sâir Müslimîn-i mezkûrîn icmâ‘ ve ittifâk ve bu kavil üzerine ittihâd-ı vifâk etdiklerinden sonra meblağ-ı mecmû‘-ı mezbûrdan hüccet-i keşf-i sâbık nâtık olduğu üzere iki bin akçe kıymet-i nıkz ihrâc olunduktan sonra mezbûr Hüseyin Halîfe’nin menzil-i mezbûra kırk sekiz bin dört yüz seksen beş akçe masrûfu olduğu zâhir ve mütebeyyin olmağın vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Mustafa Efendi b. Ömer ve Mehmed Çelebi b. İbrahim ile meclis-i şer‘a gelip alâ vukû‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ min-Ramazani’l-mübârek li-sene seb‘a ve mie ve elf. Şuhûdü’l-hâl: Ahmed Efendi b. Hamza el-imâm, Ali Çelebi b. Mehmed, Mustafa Efendi b. Ali câbî-i vakf, Hasan Çelebi b. Ahmed, Ali Çelebi b. Mehmed, İsa Dede b. Musa, Ömer Çelebi b. Ali, Ali Çelebi b. Mahmud, Abdurrahman Çelebi b. Mehmed, Ali Çelebi b. Kıyman?, Mehmed Çelebi b. İbrahim, Ahmed Çelebi b. Ali, Mehmed b. Osman.