İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 425 Hüküm no: 323 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaya bt. Sergiz’in iddia ettiği kefalet davasını ispat edemediği Mahmiye-i İstanbul’da Nişancıpaşa mahallesi sâkinelerinden Kaya bt. Sergiz nâm Ermeniye zâtını ma‘rifet-i şer‘iyye ile ârifân Osman Haseki b. Ali ve mezbûrenin oğlu Bergos v. Drador ta‘rîfleriyle mu‘arrefe oldukdan sonra dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde medîne-i Üsküdar’a tâbi‘ Kuzguncuk nâm karyede sâkin işbu râfi‘ü’l-vesîka Esyandoni v. Yamandi nâm zimmî muvâcehesinde üzerine da‘vâ ve takrîr-i kelâm edip bundan akdem mezbûrun zevce-i mutallakası olan Sima bt. Yasef nâm nasrâniyeye ikişer ve beşer köşeli bir incili serpûşumu yirmi üç guruşa bey‘ u teslîm ol dahi iştirâ ve tesellüm eyledikde semenleri olan min-haysü’l-mecmû‘ yüz kırk iki guruşu mezbûr Esyandoni emir ve kabûlü hâvîye kefâlet-i sahîha-i şer‘iyye ile kefîl olmuşidi hâlâ suâl olunup meblağ-ı mezbûrun bi hükmi’l-kefâle alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mutâbıka beyyine taleb olundukda ityân-ı beyyine içün kirâren ve mirâren istimhâl etmekle mehl-i şer‘î birle ba‘de’l-imhâl ityân-ı beyyineden izhâr-ı acz ile istihlâf etmeğin fi’l-hakīka müdde‘î-i mezbûrun eşyâ-i muharrere-i mezbûre semenlerinden zevce-i mutallakası mezbûre Sima zimmetinde olan cem‘an yüz kırk iki guruş hakkına kefâlet-i sahîha ile kefîl olmayıp ol vechile meblağ-ı mezbûr bi hükmi’l-kefâleti’l-mezkûre zimmetine edâ lâzım gelmediğine mezbûr Esyandoni’ye yemîn teklîf olundukda ol dahi hasbe’l-mesûl yemîn billâhillezî enzele’l-İncîle alâ İsa-aleyhisselâm- etmeğin mûcebiyle [102a] müdde‘iye-i mezbûre bilâ-tenbîh bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sânî aşar min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, fahrü’l-eşbâh ve’l-a‘yân Mehmed Ağa ser-çavuşân, fahrü’l-akrân ve’l-ekfâ Odabaşı Mustafa Ağa, el-Hâc Halil Efendi b. Mehmed, Mehmed Efendi b. Hüseyin, Ali Beşe b. Mehmed, Osman Haseki b. Ali.