İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 426 Hüküm no: 324 Orijinal metin no: [102a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karcıbaşı Süleyman’ın Yalakabad’dan İstanbul’a kar getirerek esnafa satmak üzere anlaşma yaptığı Mahmiye-i İstanbul’da hâlâ Karcıbaşı olan Süleyman Ağa b. Mehmed meclis-i şer‘-i şerîf-i enverde ve mahfel-i dîn-i münîf-i ezherde mahmiye-i mezbûrede Şerbetçiler Kethudâsı olan Ali Beşe b. Mustafa ve yiğitbaşıları Hüseyin Çelebi b. Ebûbekir ve ihtiyarlarından el-Hâc Mustafa b. Halil ve Abdülkerim Çelebi b. Ebûbekir ve Şaban Beşe b. Halil ve Receb Çelebi b. Hasan ve Abdullah Beşe b. Hasan ve Himmet Beşe b. Osman ve es-Seyyid el-Hâc İsmail Çelebi b. es-Seyyid Receb ve Ahmed Çelebi b. Halil ve Mustafa b. Hamza ve Mehmed b. İbrahim ve Ahmed Ağa b. Mahmud, ve Hasan Çelebi b. Receb nâm kimesneler mahzarlarında takrîr-i kelâm ve ta‘bîr ani’l-merâm edip kadîmü’l-eyyâmdan şiddet-i harâret günlerinde Yalakâbad kazâsına tâbi‘ Koca Tepesi nâm mevzî‘den mahmiye-i mezbûreye gelen kar şerbetçi tâifesinin dükkânlarına tevzî‘ olunagelmeğin işbu sene-i mübârekede ben mahâll-i mezbûrdan cemî‘-i harcı kendi üzerime olmak üzere her yükü kırk ellişer paraya olmak üzere mezbûrûnun dükkânlarına mu‘tâd üzere kar îsâl ve teslîm edip koltukçu tâifesine kar vermemek üzere mezbûrûn ile ahd ve mîsâk ve kavl ve ittifâk eylediğimizde mezbûrûn minvâl-i muharrer üzere kendülere teslîm ve bey‘ olunan karın ber-vech-i muharrer her yükü içün bana kırk ellişer para vermek üzere ta‘ahhüd eylediler dedikde gıbbe’t-tasdîkı’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâdis aşar min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: el-Hâc Mustafa Çelebi kethudâ-yı muhzırân, İbrahim Çelebi b. el-Hâc Ahmed, Mustafa Çelebi b. Şaban, Ahmed b. Ahmed, Receb b. Süleyman.