İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 427 Hüküm no: 325 Orijinal metin no: [102a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin mehrini alarak kocası İbrahim’den boşandığı Mahmiye-i İstanbul’da Darbhâne kurbünde Soğan Ağa mahallesinde sâkin Ali b. Hasan meclis-i şer‘-i şerîf-i enverde Ayşe bt. Ali nâm hatun mahzarında ikrâr-ı tâm ve takrîr-i kelâm edip mezbûr Ayşe’nin zevci gāib ani’l-meclis karındaşım İbrahim nâm kimesne diyâr-ı âhara gider oldukda mezbûre Ayşe’nin yedinden bi tarîkı’l-emâne kendüye rıkkını mu‘terîfe olan işbu Macariyyü’l-asl Gülistan nâm câriyesini ve eşyâ-i memlükesinden iki kilim ve bir müsta‘mel seccâde ve bir müsta‘mel destâr ve bir alaca kaftan ve bir kırmızı döşek ve bir hilâli kuşağını vaz‘-ı yed ve teslîm etmekle zikrolunan mevsûfe-i mezbûre Gülistan ile eşyâ-i muharrere-i mezkûre mezbûre Ayşe’den taleb ve da‘vâ ve ahz u kabza ve ba‘de’l-kabz îsâle ve mezbûre Ayşe ile hüsn-i imtizâcları olmamağla tatlîk edip zimmetinde mütekarrer ve ma‘kūdün aleyh olan yirmi guruş mehr-i mü’ecceli edâya tarafından beni vekîl ben dahi ber-vech-i muharrer vekâlet-i mezbûreyi ba‘de’l-kabûl ber-vech-i muharrer vekîl olduğumu işbu hazırân bi’l-meclis Yusuf b. Hasan ve Mustafa b. Hasan nâm kimesneler ile vech-i şer‘î üzere mezbûre Ayşe’nin muvâcehesinde ba‘de’l-isbât bi’l-vekâle mezbûre Ayşe’yi talâk-ı bâyin ile tatlîk ve mehr-i müecceli olan meblağ-ı mezbûr yirmi guruş ile iddet-i nafaka ve me’ûnet-i süknâsı içün dahi sekiz guruş ki cem‘an yirmi sekiz guruşu mezbûre Ayşe yedine def‘ u teslîm ol dahi ber-vech-i muharrer yedimden ahz u kabz etdiğinden sonra mezbûre Ayşe Hatun dahi mezbûre Gülistan ile eşyâ-i muharrer-i mezkûreyi bana def‘ u teslîm ben dahi bi’l-vekâle yedinden bi’t-tamam ahz u kabz eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb ve tahrîr olundu. Fi’l-yevmi’l-ışrîn min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: İbrahim Çelebi b. Ahmed, Mustafa b. Şaban, Receb b. Süleyman, Ahmed b. Ahmed, Ali b. Bali, Mehmed b. Mehmed, Ahmed b. Mehmed ve gayruhum mine’l-huzzâr.