İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 433 Hüküm no: 327 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gabril v. Garih’in Abraham v. Abdülmesih’deki alacağını tahsil ettiği Tâife-i Yahûd’un eski İstanbul cemâ‘atinden olup mahrûse-i Galata kazâsına tâbi‘ Ortaköy nâm karye sükkânından Abraham v. Salamon nâm Yahûdî meclis-i şer‘-i şerîf-i enverde sarrâf tâifesinden olup mahmiye-i İstanbul’da Vezîrhanı’nda sâkin işbu rafiü’l-vesîka Gabril v. Garih nâm zimmî ile Bağdad tüccârından olup han-ı merkūmda sâkin Abraham v. Abdülmesih nâm zimmî muvâcehelerinde ikrâr-ı tâm ve takrîr-i kelâm edip merkūm Bağdadlı Abraham zimmetinde cihet-i karz-ı şer‘îden beş yüz guruş hesâbınca iki yüz yaldız altunu hakkım olmağla merkūm Bağdâdî Abraham dahi ber-vech-i muharrer yaldız altununa tebdîl [ve] bana def‘ u teslîm etmek içün malından merkūm Kabril’e beş yüz guruşluk atîk zolatasını def‘ u teslîm ol dahi ahz u kabz ve kendi mesârifine sarfla istihlâk eyledikden sonra merkūm Bağdadlı Abraham meblağ-ı merkūm ile beni mezkûr Kabril üzerine cümlemiz bir meclisde iken havâle-i sahîha-i şer‘iyye ile havâle ve her birimiz havâle-i mezkûreyi kabûl eylediğimizden sonra meblağ-ı merkūm beş yüz guruşu min-ciheti’l-havâleti’l-mezkûre mezkûr Gabril’den taleb ve da‘vâ eylediğimde ol dahi cevâbında meblağ-ı merkūm beş yüz guruşu ba‘de’l-havâle han-ı merkūmda kendi odamda tamamen sana edâ ve teslîm eyledim deyü def‘le mukābele ve def‘-i mezbûrunu han-ı merkūm sükkânından Ohan v. Tatos ve Abraham v. Kader şehâdetleriyle hâkim-i muvakkı‘-ı sadr-ı küttâb tûba lehû ve hüsne me’âb hazretleri huzûrlarında benim muvâcehemde şer‘an isbât etmekle meblağ-ı merkūm mutâlebesi içün bî vech mu‘ârazadan men‘ olunmuşidim hâlâ deyn-i mezbûru nâtık ve merkūm Bağdadlı Abraham’ın hatt u hatmini hâvî yedimde olan temessükü kendüye def‘ u teslîm edip husûs-ı mezbûra ve sâire müte‘allika âmme-i da‘vâdan ben mezbûrân Gabril ve Bağdadlı Abraham’ın zimmetlerini ibrâ-yı âmm-ı kātı‘u’n-nizâ‘la ibrâ ve ıskāt edip onlar dahi husûs-ı mezbûra ve sâire müte‘allika âmme-i da‘vâdan benim zimmetimi ibrâ-yı âmm-ı kātı‘u’n-nizâ‘la ibrâ ve ıskāt eylediler min-ba‘d birbirimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Hüseyin Efendi kethudâ-i şeyhülislâm-ı sâbık hazret-i Mehmed Efendi, umdetü’l-müderrisîni’l-kirâm Mustafa Efendi kassâm-ı beledî, Abdurrahman Efendi halîfe-i muhâsebe, es-Seyyid Ahmed Çelebi et-tabîb, Sayyafzâde Ahmed Çelebi, el-Hâc Ali v. Musa, el-Hâc Abdülkerim b. İsa, Seyyid Ahmed Çelebi b. es-Seyyid Abdullah Bağdâdî, el-Hâc Mehmed b. el-Hâc Yusuf.