İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 434 Hüküm no: 328 Orijinal metin no: [103b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mısır tüccarlarından Hasan b. Ali’nin Tüccar Mehmed Çelebi’ye ait siyah keteni Mısır’dan İstanbul’a naklettiği Mahmiye-i İstanbul’da Mısır tüccârlarından el-Hâc Hasan b. el-Hâc Ali meclis-i şer‘-i şerîf-i enverde Rodoslu misilli reis sefînesinde yazıcı olan Yamandi v. Viyako nâm zimmî muvâcehesinde ikrâr-ı tâm ve takrîr-i kelâm edip Mısr-ı Kāhire’de vâki‘ Reşid iskelesinde müsafiren sâkin iken tüccâr tâifesinden Mehmed Çelebi nâm kimesne götürüp mahmiye-i mezbûrede bana teslîm içün mezbûrun sefînesiyle on bir buçuk kantar siyah ketenini Mezbûr Yamandi zimmîye teslîm ol dahi kabz ve sefîne-i mezbûreye tahmîl ve mahmiye-i mezbûrede vâki‘ Gümrük iskelesinde zikrolunan on bir buçuk kantar kara keteni sefîne-i mezbûreden ba‘de’l-ihrâc bana teslîm ben dahi kabz eyledim dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilkâ‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem Darbhâne Nâzırı es-Seyyid Abdülkerim Efendi, Mehter Ahmed Bey b. Abdurrahman, Rodosî Mollazâde Ahmed Çelebi, Odabaşızâde Mehmed Çelebi, Rodosî Mehmed Çelebi, Mustafa b. Şaban.