İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 434 Hüküm no: 329 Orijinal metin no: [103b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed Hatun’un sonradan yaptırdığı pencerelerin komşusu Hasan Efendi b. Mehmed’in menziline verdiği zararın men edilmesi Husûs-ı âti’l-beyânın mahâllinde ketb ve tahrîri iltimâs olunmağın imtisâlen lehü savb-ı şer‘-i mutahharadan fahrü’l-müderrisîni’l-kirâm keşif nâibimiz olan Abdullah Efendi b. Ali irsâl olunup ol dahi hâssa mi‘mâr lardan es-Seyyid Mustafa Halîfe b. Eyüp ve Salih b. Ali ile mahmiye-i İstanbul’da Abdi Subaşı mahallesinde sâkin işbu bâ‘isü’l-kitâb Hasan Efendi b. Mehmed nâm kimesnenin menziline varıp zeyl-i vesîkada muharrerü’l-esâmî bî-garaz Müslimîn mahzarlarında akd-i meclis-i şer‘ eylediğinde mezbûr Hasan Efendi meclis-i ma‘kūd-ı mezbûrda câr-ı mülâsıkı Ayşe bt. Mehmed nâm hatunun zevci ve tarafından husûs-ı âti’z-zikre vekîl olduğu zâtını ma‘rifet-i şer‘iyye ile ârifân Osman Bey b. Yunus ve Ahmed Bey b. Abdullah nâm kimesneler şehâdetleriyle şer‘an sâbit olan Nasuh Efendi b. Mehmed nâm kimesne mahzarında üzerine da‘vâ ve takrîr-i kelâm edip müvekkile-i mezbûre Ayşe ber-vech-i meşrûtiyyet tasarrufunda olan işbu menzilde ihdâs eylediği dört aded penceresinin ve tahtânîde vâki‘ dehlîzin benim menzilimin makarr-ı nisvân olan mevâzi‘ine havâlesi olmağla nazar olunup men‘ u def‘ etdirmek matlûbumdur dedikde gıbbe’s-suâl vekîl-i mezbûr cevâbında zikrolunan pencerelerin ve dehlîzin muhdes olduğunu ba‘de’l-ikrâr mi‘mârân-ı mezbûrân ma‘a’l-Müslimîni’l-mezkûrîn müdde‘î-i mezbûrun menzilinde mahâll-i nizâ‘ olan mevâzi‘ine bi’l-muvâcehe nazar eyledikde fi’l-hakīka müvekkile-i mezbûre Ayşe’nin dört aded muhdes pencerelerinin ve dehlîz-i mezbûrun müdde‘î-i mezbûrun menzilinin makarr-ı nisvân olan mevâzi‘ine havâlesi olduğu mukarrer ve muhakkak olmağın zikrolunan dört aded pencerenin ve dehlizin havâlesini müvekkile-i mezbûre Ayşe def‘ etmek üzere vekîl-i mezbûra tenbîh eylediğini mevlânâ-yı mezbûr mahâllinde ketb ve tahrîr ba‘dehû ma‘an ba‘s olunan Mehmed Çelebi b. İbrahim ve Yunus b. Abdurrahman ile meclis-i şer‘-i şerîfe gelip alâ vukū‘ıhî inhâ ve takrîr etmeğin mâ hüve’l-vâki‘ bi’t-taleb ketb ve tahrîr olundu. Fi’l-yevmi’s-sânî aşar min-Şevvali’l-mükerrem sene [1]107 Şuhûdü’l-hâl: el-Hâc Süleyman b. Ebûbekir, Mustafa Çelebi b. Ahmed, Ömer Çelebi b. Mehmed, es-Seyyid Mehmed Çelebi b. Mehmed, İbrahim Çelebi b. Mustafa, Yunus b. Abdullah, Mahmud b. İsa ve gayruhum mine’l-huzzâr.