İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 435 Hüküm no: 330 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Ali Vakfı’ndan olup Hasan Çelebi b. Abdullah ve zevcesi Laligün Hatun bt. Abdullah’ın tasarruflarında olan ve çıkan yangında yanan binanın yeniden inşası. Husûs-ı âti’l-beyânın mahâllinde ketb ve tahrîri içün fermân-ı âlîşân sâdır olmağın savb-ı şer‘-i şerîfden fahrü’l-müderrisîni’l-kirâm keşif nâibimiz Abdullah Efendi b. Ali irsâl olunup ol dahi hâssa mi‘mâr larından Mustafa Halîfe b. Abdullah ve Ali Halîfe b. Abdülmennan ile mahmiye-i İstanbul’da Mollahüsrev mahallesinde vâki‘ merhûm Kara Ali Vakfı’ndan olup bir tarafdan vakf-ı mezbûrdan Hasan nâm kimesne tasarrufunda olan oda ve bir tarafdan Kemânî Mehmed Ağa hatunu mülkü ve bir tarafdan yine vakf-ı mezbûrdan Hüseyin Beşe tasarrufunda olan oda ve bir tarafdan tarîk-i hâss ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i mübîn eyledikde menzil-i mahdûd-ı mezbûr icâreteyn-i ma‘lûmeteyn ile yedlerinde ve taht-ı tasarruflarında olan işbu râfi‘ü’l-kitâb Hasan Çelebi b. Abdullah ve zevcesi La‘lgûn Hatun bt. Abdullah meclis-i ma‘kūd-ı mezkûrda vakf-ı mezbûra meşrûtiyyet üzere bi’l-fi‘l mütevellî olup zâtı Mehmed Efendi b. Derviş ve İbrahim Efendi b. Halil ta‘rîfleriyle mu‘arrefe olan Aynî Hatun bt. Mehmed muvâcehesinde takrîr-i kelâm ve bast-ı merâm edip menzil-i mezbûrun ebniyesi bin yüz beş senesinde vâki‘ harîk-i kebîrde bi’l-külliye muhterika olup cânib-i vakf-ı mezbûrdan bir vechile binâya müsâ‘ade olmamağla kendi malımız ile ihdâs edeceğimiz ebniye mülkümüz olmak üzere mütevellî-i mezbûr müceddeden binâya izin ve yedimizde ber-vech-i muharrer izin temessükü vermek biz dahi menzil-i mezbûru kendi malımız ile mülkümüz olmak üzere binâ etmişidik hâlâ masrûfumuz keşif ve hüccet olunmak matlûbumuzdur dediklerinde gıbbe’t-tasdîkı’ş-şer‘î mi‘mârân-ı mezbûrân menzil-i mezkûru bi’l-muvâcehe misâha eylediklerinde tûlen ve arzan bi-hesâbı terbî‘î yetmiş yedi zirâ‘ sakf kırkar akçeden üç bin seksen akçe ve bi-hesâbı mezbûr kırk beş zirâ‘ yassı şişeli çam tahtası tavan zirâ‘ı otuzar akçeden bin üç yüz elli akçe ve bi-hesâbı mezbûr kırk beş zirâ‘ ağa tahtası döşeme zirâ‘ı otuz akçeden kezâlik bin üç yüz elli akçe bi-hesâbı mezbûr seksen dört zirâ‘ beyaz sıvalı dolma duvar zirâ‘ı otuzar akçeden iki bin beş yüz yirmi akçe ve bir sâde raf yüz yirmi akçe ve çıkrıkcı işi çam tahtası kapaklı dört aded pencere her biri yüz ellişer akçeden altı yüz akçe ve bir sâde musandıra dört yüz akçe ve bir sâde ocak ma‘a davlunbaz üç yüz akçe ve bi-hesâbı mezbûr dehlizde vâki‘ altı zirâ‘ tahta perde zirâ‘ı yirmişer akçeden yüz yirmi akçe ve on ayak nerdübân ma‘a sahn üç yüz akçe ve ağa tahtasından bir sokak kapısı üç yüz akçe ve sekiz yama direği her biri kırkar akçeden üç yüz yirmi akçe ve iki destek kırkar akçe ve bir kenîf ma‘a kapı iki yüz elli akçe ve tahtânîde vâki‘ bi-hesâbı mezbûr altı zirâ‘ taşı mahlût duvar zirâ‘ı yirmişer akçeden altı yüz akçe ve yine tahtânîde vâki‘ bi-hesâbı mezbûr altı zirâ‘ dolma duvar zirâ‘ı on beş akçeden doksan akçe ve kalkan perde yüz elli akçe ve bir oda kapısı yüz elli akçe ki min-haysü’l-mecmû‘ on iki bin kırk akçe ile ancak olup noksan ile olmak mümkün değildir deyü icmâ‘ ve ittifâk ve ihbâr etdiklerinde vâki‘ hâli mevlânâ-yı mezbûr mahâllinde ketb ve tahrîr ba‘dehû ma‘an irsâl olunan Mehmed Çelebi b. İbrahim ve Yusuf b. Abdullah ile meclis-i şer‘a gelip alâ vukū‘ıhî inhâ ve takrîr etmeğin mâ vaka‘a bi’t-taleb ketb ve tahrîr olundu. Fi’l-yevmi’l-hâdî aşar min-Zilkadeti’ş-şerîfe li-sene seb‘a ve mie ve elf. Şuhûdü’l-hâl: İbrahim Efendi b. Halil, Mustafa Efendi b. Mehmed, Mehmed b. Ahmed, Mehmed Ağa b. Derviş, Ali b. Mehmed, Mustafa b. Musa, Abdurrahman b. Hasan, Hasan b. Mehmed, Ali b. Receb.