İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 436 Hüküm no: 331 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Aleks v. Neyil’in Muharrem Efendi b. İbrahim’in kölesi olduğunun anlaşıldığı Mahmiye-i İstanbul’da cennet-mekân firdevs-i âşiyân merhûm ve mağfûrun leh Sultân Bâyezid Han aleyhi’r-rahmeti ve’l-gufrân Câmi‘-i şerîfi hatîbi olan işbu râfi‘ü’l-kitâb Muharrem Efendi b. İbrahim meclis-i şer‘-i şerîf-i enverde vilâyet-i Anadolu’da Gölpazar-ı Bartın kazâsına tâbi‘ Gölceğiz nâm karye ahâlîsinden İbrahim b. Şaban nâm kimesne mahzarında üzerine da‘vâ ve takrîr-i kelâm edip işbu açık kaşlı gök elâ gözlü orta boylu sarı sakallı Rusiyyü’l-asl Aleksi v. Tanil nâm nasrânî abd-i memlûküm olup târih-i kitâbdan beş sene mukaddem Havâss-ı aliyye kazâsı muzâfâtından Çekmece-i sagīr nâhiyesine tâbi‘ Kaparık? nâm karyede vâki‘ çiftliğimde mülkümden ibâk etmişidi hâlâ mezbûrun yedinde buldum suâl olunup alıverilmesi matlûbumdur dedikde gıbbe’s-suâl mezbûr İbrahim cevâbında mevsûf-ı mezbûru târih-i kitâbdan iki sene mukaddem zikrolunan Gölceğiz nâm karyede bölük sipâhilerinden İsmail Bey nâm kimesneden elli altı guruş semen-i medfû‘a iştirâ ve tesellüm etmişidim deyü vaz‘-ı yedini ikrâr lâkin müdde‘î-i mezbûrun mülkü olup mülkünden ibâk eylediğini inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden olup nâhiye-i mezbûreye tâbi‘ İspartuvan nâm karye sükkânından Yusuf Çelebi b. Abdullah ve Hasan Beşe b. Ali nâm kimesneler li-ecli’ş-şehâde meclis-i şer‘a hâzıran olup isre’l-istişhâd fi’l-hakīka işbu mevsûf-ı mezbûr Aleksi müdde‘î-i mezbûr Muharrem Efendi’nin abd-i memlûkü olup târih-i kitâbdan beş sene mukaddem mülkünden ibâk etmişidi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mevsûf-ı mezbûru âhara bey‘ veyâ hîbe etmeyip velhâsıl taraf-ı şer‘iyyeden bir tarîk ile mülkünden ihrâc etmediğine müdde‘î-i mezbûr Muharrem Efendi’ye yemîn teklîf olundukda ol dahi hasbe’l-mesûl yemîn billahi te‘âlâ etmeğin mûcebiyle ba‘de’l-hükm ve’t-tenbîh mâ hüve’l-vâki‘ bi’t-taleb ketb olundu. Fi’l-yevmi’l-ışrîn min-Zilkadeti’ş-şerîf li-sene seb‘a ve mie ve elf. Şuhûdü’l-hâl: Mehmed Efendi b. Hüseyin, el-Hâc Mehmed Efendi b. Ahmed, Ali Beşe çukadâr, Ebûbekir Beşe b. Sinan, Hasan b. Muslu Abdülkerim b. Derviş, Mustafa b. Osman, Bayram b. Ali.