İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 437 Hüküm no: 332 Orijinal metin no: [104b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü esnafının vefat eden kethudaları Küçük Mehmed b. Pervane’nin yerine İbrahim b. Ahmed’i kethuda ve Begoz v. Manol’u yiğitbaşı seçtikleri Mahmiye-i İstanbul’da kömürcü tâifesinden es-Seyyid Mustafa Çelebi b. Ali ve es-Seyyid İbrahim Çelebi b. Ali ve Ali Beşe b. İsmail ve Salih Beşe b. Ramazan ve Mehmed Çelebi b. Hüseyin ve Mustafa b. Mansur ve Ömer Beşe b. Mehmed ve Mustafa b. Seydi ve Ömer b. Mehmed ve İbrahim b. Mehmed ve İsmail b. Ahmed ve Ahmed b. Hüseyin ve Ahmed b. Abdullah nâm kimesneler ile Hadros v. Marat ve Misayil v. Vasil ve Norsez v. Kiragos ve Hokaz v. Ohan ve Peter v. Vartan ve Norhat v. Ferhat ve Şirin v. Hâfız ve Asador v. Hadros ve Mikail v. Takor Ve Hıristo v. Marat ve Kilyar v. Begos ve Avanis v. Kiragos ve Hornis v. Şirvan, ve Aslan v. Hıristo ve Kosta v. Kiragos ve Agop v. Yoseb ve Nikola v. Şihak ve Şirvan v. Korta nâm zimmîler ve sâirleri meclis-i şer‘-i şerîf-i enverde yine tâife-i mezbûreden İbrahim b. Ahmed ve Bogos v. Manol muvâcehelerinde her biri takrîr-i kelâm ve bast-ı merâm edip mukaddemâ üzerimize kıbel-i şer‘den kethudâ nasb u ta‘yîn olunan Küçük Mehmed b. Pervâne fevt olmağla san‘atımıza vukūf-ı tâmmı olup umûr-ı kethudâlığa ehil ve kendiden her vechile rızâ ve şükrân üzere olduğumuz merkūm İbrahim üzerimize kethudâ ve merkūm Bogos’u yiğitbaşı ihtiyâr eyledik hâlâ kıbel-i şer‘den dahi mezbûr İbrahim kethudâ ve mezbûr Begos yiğitbaşı nasb u ta‘yîn ve vesîka tahrîr olunmak matlubumuzdur dediklerinde kazıyye vech-i muharrer üzere olduğunu sikāt-ı makbûletü’l-kelimât dahi ihbâr etmeleriyle mezbûr İbrahim müteveffâ-yı mezbûrun yerine tâife-i mezbûrenin üzerlerine kethudâ ve merkūm Begos yiğitbaşı nasb u ta‘yîn olundukda onlar dahi kabûl ve herbiri hizmet-i lâzımesin edâya ta‘ahhüd ve iltizâm etmeğin mâ hüve’l-vâki‘ bi’t-taleb ketb ü tahrîr olundu. Fi’l-yevmi’s-sâdis ve’l-ışrîn min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Mehmed Çelebi b. İbrahim, Hasan Çelebi b. Mehmed, İbrahim Çelebi b. Ahmed, Mustafa Çelebi yiğitbaşı, el-Hâc Süleyman yiğitbaşı, İbrahim Çelebi terâzibaşı, Mezarcızâde Ali Çelebi, Ramazan Çelebi b. ( ).