İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 438 Hüküm no: 333 Orijinal metin no: [104b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Nakis v. Gülaser’in gözünün yaralanmasına sebep olan at hamalı Şaban b. Muharrem’den on üç kuruş alarak sulh olduğu Fi’l-asl vilâyet-i Anadolu’da Erzincan kazâsına tâbi‘ Zengiyek? nâm karye ahâlîsinden olup hâlâ mahmiye-i İstanbul’da Kapan-ı dakīk’de uncu olan Nakis v. Gülaser nâm zimmî meclis-i şer‘-i şerîf-i enverde at hammâlı tâifesinden işbu râfi‘u’l-kitâb Şaban b. Muharrem nâm kimesne mahzarında ikrâr ve takrîr-i kelâm edip merkūm Şaban târih-i kitâbdan üç gün mukaddem iki re’s bargirlerine Kapan-ı dakīk İskelesi’nden odun tahmîl eyledikden sonra zikrolunan bargirleri kendi ra‘y etmeyip bir vechile zabtlarına kadir olmayan tahmînen on yaşında işbu sagīr Hüseyin b. Mehmed’e teslîm etmekle sagīr-i mezbûr dahi bargirler ile ma‘an gelirken üzerinde olan odun benim sol gözüme isâbet edip ondan nâşî mârrü’z-zikr sol gözüm bi’l-külliye intifâ‘dan kalmağın husûs-ı merkūm mezkûr Şaban’ın te‘addî ve taksîrinden olmuşidi deyü mûceb-i şer‘îsini mezbûr Şaban’dan taleb ve da‘vâ eylediğimde beynimizde münâza‘ât-ı kesîre cereyân etmişidi el-hâletü hâzihî da‘vâ-yı mezbûremden mezkûr Şaban’la beni vesâtat-ı Müslimîn ile on üç guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on üç guruşu mezbûr Şaban yedinden ahz u kabz edip husûs-ı mezbûra vemâ tahaddese minhu’ya müte‘allika âmme-i da‘vâdan mezbûr Şaban ile sagīr-i mezbûr Hüseyin’in zimmetlerini ibrâ-i âmm-ı kātı‘u’n-nizâ‘la ibrâ ve ıskāt edip ol dahi bedel-i sulh-ı mezbûra müte‘allika âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşar min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: Osman Beşe b. Şaban el-Mübâşir, Abdullah Efendi b. Ali el-imâm, Değirmenci Mehmed Çelebi b. Hüseyin, Hasan Çelebi b. Receb, İsmail b. Mustafa.