İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 440 Hüküm no: 336 Orijinal metin no: [105a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapsedilen yeniçerileri mütekaidlerinden Mustafa Bey b. Abdullah’a Yamak Ahmed Beşe b. Mustafa’nın kefil olmasıyla serbest bırakıldığı Fi’l-asl medîne-i Erzurum ahâlîsinden olup İznikmidli Karkaviloğlu Ali Beşe nâm kimesneye cihet-i deyn-i şer‘îden altı yüz kırk beş guruş deyni için Dergâh-ı âlî yeniçerilerinin yirminci ağa bölüğüne mahsûs oda mütekā‘idlerinden olmağla yedi aydan beri oda-i mezbûrede mahbûs olan Mustafa Bey b. Abdullah b. Abdülmennan nâm kimesneden ber-vech-i âtî istihbâr-ı şer‘î sudûrundan sonra hâlâ oda-i mezbûre ahâlîsinin odabaşıları olan Mustafa Beşe b. Mehmed ve Yusuf Beşe b. Mehmed nâm kimesne li-ecli’l-ihbâr meclis-i şer‘-i hatîre hâzırûn olup herbiri şöyle haber verdiler ki; fi’l-vâki‘ müstahber-i mezbûr Mustafa Beşe’nin üzerinde lâbis olduğu köhne libâsından mâ‘adâ ism-i mâl ıtlâk olunur bir nesnesi olmamağla müflis ve mu‘dim olduğu ma‘lûmumuzdur hâlâ mezbûr Mustafa Beşe’nin kudret-i mâl [ve] vüs‘at-i hâle vusulüne değin hapisden ıtlâk ve imhâl olunup sebili tahliye olunmak lâzım ve elzemdir deyü herbiri alâ tarîkı’ş-şehâde haber vermeleriyle mezbûr Mustafa Beşe’nin nefsine medîne-i Erzurum’da Câmi‘-i kebîr mahallesi sükkânından olup yine oda-i mezbûre ahâlîsinden Yamak Ahmed Beşe b. Mustafa nâm kimesne kefil olmağın müstahber-i mezbûr Mustafa Beşe ber-vech-i muharrer kudret-i hâli vüs‘at-i hâle vusûle değin hapisden ıtlâk ve imhâl olunup sebîli tahliye olunmağın mâ hüve’l-vâki‘ bi’t-taleb ketb olundu. Fi’l-yevm 22 Zilhicce sene [1]107 Şuhûdü’l-hâl: Yusuf Beşe b. Mehmed el-mübâşir, Hamza Beşe b. Süleyman, İbrahim Çelebi b. Ahmed, Ali Beşe b. Osman çukadar, Mehmed Çelebi b. İbrahim, Halil Efendi b. Nasuh, Mehmed Efendi b. Hüseyin, Mehmed Çelebi b. Ali, Receb b. Osman.