İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 442 Hüküm no: 338 Orijinal metin no: [105b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kudüs kadısı iken Şeyhülharem Seyyid Abdüllatif Efendi b. Abdülkadir’in terekesinden usulsüz para alan Mahmud Efendi’nin aldığı parayı vârislerle sulh yoluyla anlaşarak iade ettiği Husûs-ı âti’z-zikrin mahâllinde ketb ü tahrîri iltimâs olunmağın savb-ı şer‘den irsâl olunan fahrü’l-müderrisîn İbrahim Efendi b. Mehmed el-Hamîdî mahmiye-i İstanbul’da sâbıkā Rumeli kazaskeri olan a‘lemü’l-ulemâi’l-izâm efdalü’l-fudalâi’l-fihâm yenbû‘u’l-fezâi’l ve’l-ma‘âlî metbû‘i’l-efâzıl ve’l-e‘âlî ilmü’l-alem ve’l-hüdâ menârü’l-fazl ve’t-tukā sa‘âdetlü es-Seyyid Ali Efendi hazretlerinin sa‘âdethânelerine varıp zeyl-i kitâbda muharrerü’l-esâmî Müslimîn huzurlarında akd-i meclis-i şer‘-i Nebevî eyledikde Kuds-i şerîf’de sâkin iken bundan akdem vefât eden Şeyhü’l-harem es-Seyyid Abdüllatif Efendi b. Abdülkadir b. Musa’nın verâseti zevceteyn-i metrûketeyni Emetullah bt. Abdurrahman ve Fâtıma bt. Mehmed nâm hatunlar ile sulbî kebîr oğlu es-Seyyid Abdullah ve sagīr oğlu es-Seyyid Hasan ve sulbiye-i sagīre kızları Şerife Râbia ve Şerife Bedri’ye ve zevcesi mezbûre Fâtıma’dan ve câriye-i memlûkesi Gülistan bt. Abdullah [106a] nâm hatunlardan zuhûr eden hamllerine münhasıra olduğu şer‘an zâhir ve müte‘ayin oldukdan sonra mezbûre Gülistan’dan zuhûr eden haml-i mezbûra ve sagīre-i mezbûre Bedri’ye kıbel-i şer‘den mansûb vasîleri olan es-Seyyid Fahreddin Efendi b. Abdüssamed meclis-i ma‘kūd-ı mezbûrda sâbıkā Kuds-i şerîf kadısı olan a‘lemü’l-ulemâi’l-izâm efdalü’l-fudalâi’l-fihâm Mahmud Efendi b. ( ) tarafından husûs-ı âti’l-beyâna vekîl-i şer‘îsi olan kuzât-ı Mısriyye’den Ali Efendi b. Abdurrahman mahzarında bi’l-vesâye ikrâr ve takrîr-i kelâm edip mezbûr Ali Efendi’nin müvekkili mûmâ-ileyh Mahmud Efendi Kuds-i şerîf kadısı olduğu hâlde kısmet-i askeriye dahi kendiye tefvîz olunmağla müteveffâ-yı mezbûr es-Seyyid Abdüllatif Efendi’nin terekesini tahrîr ve beyne’l-verese taksîm ve tevzî‘ etdiği vakitde resm-i kısmetden hâric müteveffâ-yı mezbûrun terekesinden bi-gayr-ı hakkın bin guruş ahz u kabz ve kendi mesârifine sarfla istihlâk etmekle meblağ-ı mezbûrdan vasîsi olduğum sagīrân-ı mezbûrânın hisse-i irsiyelerini mûmâ-ileyh Mahmud Efendi’den taleb ve da‘vâ etdiğimde ol dahi bi’t-tevliye inkâr edip ben dahi müdde‘âmı bir vechile isbâta kadir olamayıp sagīrân-ı mezbûrân haklarında sulh min-külli’l-vücûh enfa‘ olduğuna binâen mûmâ-ileyh Mahmud Efendi da‘vâ-yı mezkûremden benimle yüz elli guruş üzerine sulh oldukda ben dahi sulh-ı mezbûru kabûl ve bedel-i sulh olan meblağ-ı mezbûr elli guruşu vekîl-i mezbûr yedinden bi’t-tamam ahz u kabz eyledim ba‘de’l-yevm husûs-ı mezkûra müte‘allika mûmâ-ileyh Mahmud Efendi ile vechen mine’l-vücûh ve sebeben mine’l-esbâb da‘vâ ve nizâ‘ım kalmamışdır dedikde gıbbe’t-tasdîkı’ş-şer‘ vâki‘-i hâli mevlânâ-yı mezbûr mahâllinde ketb ba‘dehû ma‘an irsâl olunan Ahmed b. Ahmed ve Ali b. Bali ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: Abdürrezzak Efendi b. Bedreddin, Abdülbaki Efendi b. Hüseyin, es-Seyyid Hüseyin Çelebi b. Mehmed, eş-Şeyh Mustafa Efendi el-ilmî, Mustafa Efendi b. İsmail Efendi.