İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 443 Hüküm no: 339 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızıltaş mahallesinden vefat eden Ahmed Efendi b. Mehmed’in varislerinin kendilerine intikal eden evdeki hisselerini Hüseyin Efendi b. Üveys’e sattıkları Mahmiye-i İstanbul’da Kızıltaş mahallesi sükkânından iken bundan akdem fevt olan Ahmed Efendi b. Mehmed’in verâseti zevce-i metrûkesi Ayşe Hatun bt. Mehmed ile li-ebeveyn er karındaşı Ali Efendi’ye münhasıra olduğu şer‘an zâhir ve müte‘ayyin oldukdan sonra mezbûr Ali Efendi ve zâtını ma‘rifet-i şer‘iye ile ârifân Abdullah Efendi b. Mehmed ve İbrahim Çelebi b. Ahmed ta‘rîfleriyle mu‘arrefe olan Ayşe Hatun meclis-i şer‘-i şerîf-i enverde işbu râfi‘u’l-kitâb Hüseyin Efendi b. Üveys nâm kimesne mahzarında takrîr-i kelâm edip mahalle-i mezbûrede vâki‘ bir tarafdan Ahmed Çelebi mülkü ve bir tarafdan Fâtıma Hatun tasarrufunda olan vakıf menzil ve bir tarafdan Uğurlu nâm zimmî mülkü ve bir tarafdan tarîk-i âm ile mahdûd ve fevkānî üç bâb oda ve bir sundurma ve dehlizi müştemil menzilin ancak arsası merhûm Müstedâmzâde Mustafa Efendi nâm sahibü’l-hayrın ulemâya meşrûta vakfı ve ebniye-i mezkûresi mülk-i sırf olmağla arsa-i mezbûre tevcîh-i hâkimü’ş-şer‘le mûrisimiz mezkûr Ahmed Efendi’nin ile’l-vefât taht-ı tasarrufunda ve ebniye-i merkūme silk-i mülkünde münselik olup ba‘de’l-vefât arsa-i merkūme mahlûle olmağla kıbel-i şer‘den mezkûr Hüseyin Efendi’ye tevcîh ve ebniye-i mezbûre bi’l-irsi’ş-şer‘î bize isâbet ve intikāl etmişidi hâlâ mezbûr Ali Efendi ebniye-i mezkûreden bana isâbet eden sülüs-i erba‘ hisse-i şer‘iyemi bi cümleti’t-tevâbi‘ ve’l-levâhık mezkûr Hüseyin Efendi’ye on guruşa bey‘ ve temlîk ve teslîm ol dahi ba‘de’l-iştirâ ve’t-tesellüm semen-i mezbûr on guruşu yedinden ahz u kabz eyledim ve mezkûre Ayşe Hatun yine ebniye-i merkūmede olan rub‘ hisse-i şer‘iyemi cemî‘ tevâbi‘ ve levâhıkı ile yine mezkûr Hüseyin Efendi’ye yirmi beş guruşa bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra semen-i mezkûr yirmi [guruşu] yedinden tamamen ahz u kabz eyledim fîmâ-ba‘d ebniye-i merkūme mezkûr Hüseyin Efendi’nin mülk-i müşterâsı olmuşdur bizim alâka ve medhalimiz kalmadı keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min-Zilka‘deti’ş-şerîfe li-sene seb‘a ve mie ve elf. [106b] Şuhûdü’l-hâl: Mustafa Ağa ...? Ahmed Bey b. Veli, İbrahim Çelebi b. Ahmed, İmâm Abdullah Efendi, Yiğitbaşı Mustafa Çelebi, Ahmed Çelebi b. Mehmed, Ali Çelebi b. Bali, el-Hâc Ali Çukadar, Receb b. Osman.