İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 444 Hüküm no: 340 Orijinal metin no: [106b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Samanveren mahallesinden Mehmed Çelebi b. Receb’in aynı mahallede Dülgerzâde Hoca Şemseddin Vakfı’ndan iki dükkân ve bir arsayı kiraladığı Mahmiye-i İstanbul’da Uzunçarşı kurbünde Samanveren mahallesi sükkânından Mehmed Çelebi b. Receb nâm kimesne meclis-i şer‘-i şerîf-i enverde mahmiye-i İstanbul’da Sarrâchânebaşı’nda vâki‘ Dülgerzâde Hoca Şemseddin Vakfı’na evlâdiyet ve meşrûtiyyet üzere mütevellî olan es-Seyyid Mehmed Çelebi b. İbrahim nâm sagīrin vâlidesi olup vakf-ı mezbûra kāimmakām-ı mütevellî olan bâ‘isetü’l-kitâb Şerife Ümmühani Hatun bt. el-Hâc Ali mahzarında ikrâr-ı tâm ve takrîr-i kelâm edip sûk-ı mezkûrede mahalle-i merkūmede vâki‘ bir tarafdan vakf-ı mezbûrdan olan fincancı dükkânı ve bir tarafdan Mehmed Ağa Vakfı’ndan olan yoğurthâne ve bir tarafdan tarîk-i hâs ve bir tarafdan tarîk-i âm ile mahdûd Ma‘cûnî Uşşâkīzâde dükkânı demekle ma‘rûf bir bâb kebîr ma‘cûnî dükkânı ve bir bâb dülbentçi dükkânı ve mukābilinde vâki‘ merhûm Muhiddin el-Hattât Vakfı’ndan olan arsa ile mahlût bir bâb tahtânî sagīr odayı müştemil tûlen otuz beş zirâ‘ ve arzen beş zirâ‘ bi-hesâbı terbî‘î yüz elli beş zirâ‘ arsa-i hâliye merhûm-ı mezbûr Dülgerzâde Hoca Şemseddin Vakfı’ndan icâre-i mu‘accele ve mecmû‘u beher şehr yüz kırk akçe ücret-i müeccele ile Uşşâkīzâde el-Hâc Mehmed b. Hamza nâm kimesnenin tasarrufunda iken mezbûr el-Hâc Mehmed bilâ-veled fevt olup dükkâneyn-i mezbûreyn ile arsa-i mezkûre taraf-ı vakf-ı mezbûra âid ve râci‘ olup taraf-ı vakfdan ecr-i misli ile âhara îcârı lâzım geldikde mütevellî-i mezbûre Şerife Ümmühani Hatun zikrolunan dükkânlar ile arsa-i mezkûreyi otuz gün mikdârı hâssa münâdîlerden işbu hazır bi’l-meclis el-Hâc Yusuf b. Mehmed yediyle sûk-ı sultânîde ve mecma‘-ı nâs olan mahallelerde kirâren ve mirâren nidâ ve müzâyede etdirip rağabât-ı nâs münkatı‘a oldukda zikrolunan dükkân-ı kebîr ber-vech-i muharrer Ma‘cûnî Uşşâkīzâde dükkânı demekle beyne’n-nâs meşhûr ve ma‘rûf olmağla ecr-i misli sâir dekâkîn ecr-i mislinden min-külli’l-vücûh ezyed ve evfer olmağla dört bin guruş mu‘accelede benim üzerimde karâr edip benden gayri tâlibler bi’l-külliye kasr-ı yed etmeğin mütevellî-i mezbûr Şerife Ümmühani Hatun dekâneyn-i mezbûreyn ile arsa-i merkūmeyi meblağ-ı mezbûr dört bin guruşa mu‘accele ve beher şehr yüz kırk akçe müeccele ve izn-i hâkimü’ş-şer‘le taraf-ı vakf-ı mezbûrdan bi’t-tevliye bana îcâr ve teslîm ben dahi istîcâr ve kabûl ve tesellüm edip mu‘accele-i mezbûre dört bin guruşu vakf-ı mezbûrun Sarrâchâne başında vâki‘ ma‘rifet-i hâkimi’ş-şer‘le keşf ve ta‘mîr ve termîmine izn-i hâkim-i lâhık olan câmi‘-i şerîfin ta‘mîr ve [termîmine]sarf etmek için mütevellî-i merkūme Şerife Ümmühani Hatun’a def‘ u teslîm ol dahi ahz u kabz edip meblağ-ı mezbûr dört bin guruşa müte‘allika âmme-i da‘vâdan taraf-ı vakf ve mütevellî-i mezbûreyi ibrâ-i âmm-ı kātı‘ü’n-nizâ‘la ibrâ ve ıskāt eyledim min-ba‘d bedel-i mezbûra müte‘allika vechen mine’l-vücûh ve sebeben mine’l-esbâb da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevm 3 min-Za sene [1]107 Şuhûdü’l-hâl: el-Hâc Mustafa b. Ahmed, Abdurrahman Efendi halîfe-i muhâsebe, Salih Efendi b. Receb, Ali Çelebi b. Abdullah, Mustafa Çelebi b. Abdullah, Osman Çelebi b. Mehmed, Cafer b. Abdullah, Yusuf b. Abdullah, el-Hâc Mehmed b. Mustafa, el-Hâc Mehmed Efendi, Halil Efendi b. Mehmed, Mustafa Çelebi b. Ahmed, Abdullah Efendi İmâm-ı İbrahimpaşa, Mehmed Çelebi b. Abdülkadir, Mustafa Efendi b. Halil, Mehmed Çelebi b. Hüseyin, Mehmed Efendi kâtib-i vakf, İbrahim Çelebi b. el-Hâc Osman, el-Hâc Receb b. Mustafa, el-Hâc Eyüb b. Cafer, Receb Çelebi b. Mustafa, Usta Hüseyin râh-ı âbî, el-Hâc Abdullah râh-ı âbî, Usta Abdurrahman ser-bölük, Mustafa Çelebi b. Hüseyin ve gayruhum mine’l-hâzırîn.