İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 445 Hüküm no: 341 Orijinal metin no: [106b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üskübî mahallesinden Sefer Ağa b. Receb’in, Rus asıllı kölesi Şahin b. Abdullah’ı bir buçuk sene önce azat ettiğinin tescil edildiği Mahmiye-i İstanbul’da Ayasofya-i kebîr Câmi‘-i şerîfi kurbünde Üskübî mahallesi sükkânından Sefer Ağa b. Receb dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde ikrâr-ı tâm ve takrîr-i kelâm edip rıkkını i‘tirâf eden işbu çatık sarı kaşlı elâ gözlü uzun boylu Rusiyyü’l-asl hâmilü hâze’l-kitâb Şahin b. Abdullah nâm abd-i memlûku târih-i kitâbdan bir buçuk sene mukaddem mâlımdan tahrîr ve i‘tâk ve kayd-ı rıkkıyetden ıtlâk ve sâir ahrâr-ı asliyyîn silkine idrâc ve ilhâk eyledim târih-i mezbûrdan beri mevsûf-ı merkūm Şahin sâir ahrâr-ı asliyyîn gibi hür olmuşdur dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, fahrü’l-akrân Mehmed Ağa ser-çavuşân, fahrü’l-akrân Mehmed Ağa, el-Hâc Halil Efendi b. Mehmed, Ali Beşe Çukadâr.