İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 446 Hüküm no: 342 Orijinal metin no: [107a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Bâyezid mahallesinde Hacı Hasan b. Ahmed’in sonradan yaptırdığı üç pencerenin komşusu Hacı Mustafa b. Abdülkerim’in evine verdiği zararın önlenmesi Husûs-ı âti’z-zikrin mahâllinde ketb ü tahrîri bâbında fermân-ı âlî vârid olmağın imtisâlen-lehü savb-ı şer‘-i mutahharadan keşif nâibimiz olan fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlardan Dede Mehmed Halîfe b. İshak ve Ali Halîfe b. Abdullah ile mahmiye-i İstanbul’da Ağakapısı kurbünde Sarı Bâyezid mahallesinde sâkin el-Hâc Hasan b. Ahmed nâm kimesnenin menziline varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarında akd-i meclis-i şer‘-i şerîf eylediğinde yine mahalle-i mezbûre sükkânından el-Hâc Mustafa b. Abdülkerim nâm kimesne meclis-i ma‘kūd-ı mezbûrda mezbûr el-Hâc Hasan mahzarında üzerine da‘vâ ve takrîr-i kelâm edip mezbûr el-Hâc Hasan hâlâ müceddeden binâ eylediği işbu menzilinin fevkānî odasında tarîk-i hâs cânibinde ihdâs eylediği iki penceresinin ve köşesinde vâki‘ cam duvarın ve bir sagīr pencerenin benim menzilimin makarr-ı nisvân olan mevâzi‘ine havâlesi olmağla nazar olunup men‘ u def‘ etdirilmek matlûbumdur dedikde gıbbe’s-suâl mezbûr el-Hâc Hasan cevâbında zikrolunan pencerelerin hudûsunu ba‘de’l-ikrâr zikrolunan pencerelere bi’l-muvâcehe nazar eylediklerinde fi’l-hakīka mârrü’z-zikr pencerelerin müdde‘î-i mezbûrun menzilinin makarr-ı nisvân olan mevâzi‘ine havâlesi olduğu zâhir ve mütehakkık olmağın mezbûr el-Hâc Hasan zikrolunan üç aded pencerelerin havâlesini def‘a tenbîh eylediğini mevlânâ-yı mezbûr mahâllinde tahrîr ve ma‘an ba‘s olunan Mehmed Çelebi b. İbrahim ve Hasan b. Abdurrahman ile meclis-i şer‘a gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min-Şevvali’l-mükerrem li-sene seb‘a ve mie ve elf. Şuhûdü’l-hâl: es-Seyyid Mehmed Efendi b. es-Seyyid Yusuf, el-Hâc Mustafa b. el-Hâc Osman, el-Hâc Osman Beşe b. Abdullah, Mahmud Çelebi b. Mehmed, Ali Beşe b. İbrahim el-mübâşir, Mehmed Beşe b. Mehmed, Ali Efendi b. Mustafa.