İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 448 Hüküm no: 344 Orijinal metin no: [107b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alem Hatun Vakfı’na ait evi Afife Hatun bt. Pir Mehmed ve Emine bt. Ahmed’in hisselerine göre tasarruf etmeleri Husûs-ı âti’l-beyânın mahâllinde ketb u tahrîri bâbında fermân-ı âlî vârid olmağın imtisâlen-leh savb-ı şer‘-i mutahhardan keşif nâibimiz fahrü’l-müderrisîni’l-kirâmdan Abdullah b. Ali irsâl olunup ol dahi hâssa mi‘mârlardan Ali Halîfe b. Abdullah ve Osman Halîfe b. Abdülmennan ile mahmiye-i İstanbul’da Eminbey mahallesinde vâki‘ gallesi mahalle-i mezbûrede imâm olanlara meşrûta merhûme Âlem Hatun Vakfı olup iki tarafdan yine vakf-ı mezbûr ve bir tarafdan Abdullah Çelebi menzili ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâm olan bî-garaz kimesneler mahzarında akd-i meclis-i şer‘-i şerîf eyledikde icâreteyn-i ma‘lûmeteyn ile menzil-i mezbûrun selâse-i erbâ‘-ı şâyi‘ine mutasarrıfe olan işbu bâ‘isü’l-kitâb Afîfe Hatun bt. Pir Mehmed meclis-i ma‘kûd-ı mezbûrede menzil-i mezbûrun ber-vech-i muharrer sülüs şâyi‘asına mutasarrıfe olup zâtı ma‘rifet-i şer‘iye ile ârifân Mehmed Beşe b. Ahmed ve Hasan Çelebi b. Mehmed nâm kimesneler ta‘rîfleriyle mu‘arrefe olan Emine bt. Ahmed nâm hatun muvâcehesinde vakf-ı mezbûr mütevellîsi olan mahalle-i mezbûre imâmı Musa Efendi b. Davud hazır olduğu hâlde takrîr-i kelâm ve bast-ı merâm edip menzil-i mezbûrun ber-vech-i mübeyyen selâse-i erba‘ şâyi‘asına ve sülüs-i şâyi‘i mezbûre Emine’nin taht-ı tasarrufunda olup lâkin mezbûre Emine menzil-i mezbûrun mecmû‘undan mustakilen sâkine ve mutasarrıfe olmak ile muhâyâbi’l-mekân vechi üzere ben dahi sâkine olmak mümkün olmamağın herbirimiz hisse-i şâyi‘amıza muhâyâbi’z-zaman vechi üzere zabt ve tasarruf etmek lâzım gelmeğin mezbûre Emine rub‘ hissesiçün menzil-i mezbûrun mecmû‘undan târih-i kitâbdan üç ay tamamına değin muhâyâbi’z-zaman vechi üzere sâkine ve mutasarrıfe olup ba‘dehâ mezbûre Emine çıkıp bana teslîm ben dahi selâse-i erba‘ hissem mukābelesinde menzil-i mezbûrun mecmû‘undan dokuz ay sâkine ve mutasarrıfe olmak üzere terâzi ve tevâfuk ve bu vech üzere kavl ü ittifâk eyledik dedikde gıbbe’t-tasdîkı’ş-şer‘î vâki‘-i hâli mevlânâ-yı mezbûr mahâllinde tahrîr ba‘dehû ma‘an bâ‘is olan Ali Çelebi b. Mustafa Mehmed Çelebi b. İbrahim ile meclis-i şer‘e gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevvali’l-mükerrem li-sene seb‘a ve mie ve elf. Şuhûdü’l-hâl: Hüseyin Efendi b. Mehmed, el-Hâc Ali Çelebi b. Mustafa, Mahmed Beşe b. Ahmed, Hasan Beşe b. Mehmed, Hasan Çelebi b. Abdullah, Ali b. Abdullah.