İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 449 Hüküm no: 345 Orijinal metin no: [107b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Geliri Balaban Ağa mahallesi Mescidi’ne ait olan evin tasarrufu Ahmed b. Mustafa ve kız kardeşi Ümmühani arasında taksim edildiği Husûs-ı âti’l-beyânın mahâllinde ketb u tahrîri bâbında fermân-ı âlî vârid olmağın imtisâlen-leh savb-ı şer‘-i mutahhardan keşif nâibimiz fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlardan Ali Halîfe b. Abdullah ve Mehmed Halîfe b. Abdülmennan ile mahmiye-i İstanbul’da Balaban Ağa mahallesinde vâki‘ gallesi mahalle-i mezbûre mescid-i şerîfine imâm olanlara meşrûta vakıf olup iki tarafdan Salih Çelebi menzili ve bir tarafdan merhûm Ali Efendi bahçesi ve bir tarafdan tarîk-i âm ile mahdûd menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâm olan bî-garaz <> mahzarlarında akd-i meclis-i şer‘-i şerîf eyledikde menzil-i mahdûd-ı mezbûr icâreteyn-i ma‘lûmeteyn ile taht-ı tasarrufunda iken bundan [akdem] fevt olan Mustafa b. Mehmed nâm kimesnenin sulbî kebîr oğlu Ahmed Çelebi nâm kimesne meclis-i ma‘kūd-ı mezbûrda li-ebeveyn karındaşı olup zâtı ma‘rifet-i şer‘iye ile ârifân Mustafa b. Ahmed ve el-Hâc Ömer b. <<Ömer>> Muharrem nâm kimesneler ta‘rîfleriyle mu‘arrefe olan Ümmühani nâm hatun muvâcehesinde menzil-i mezbûrun ber-vech-i meşrûtiyet mütevellîsi olan mescid-i mezbûr imâmı Mehmed Efendi b. Hüseyin hazır olduğu hâlde takrîr-i kelâm ve bast-ı merâm edip menzil-i mezbûr ber-vech-i mübeyyen icâreteyn-i ma‘lûmeteyn ile babamız müteveffâ-i mezbûrun ile’l-vefât taht-ı tasarrufunda olup ba‘de vefâtihî intikāl-i âdî ile bana ve kız karındaşım Ümmühani’ye intikāl eyleyip ve kābil-i kısmet olup kısmet olunmak her vechile vakfa enfa‘ ve evlâ ve mütevellî-i vakf-ı mezbûr dahi izin vermekle beynimizde taksîm olunmak matlûbumuzdur dedikde gıbbe’t-tasâdiki’ş-şer‘i mi‘mârân-ı mezbûrân menzil-i mezbûru bi’l-muvâcehe mesâha eylediklerinde tûlen on dokuz ve arzen on beş bi-hesâb-ı terbî‘i iki yüz seksen beş zirâ‘ binâ ma‘a’l-arsada mezbûrânın herbirine yüz kırk ikişer buçuk zirâ‘ binâ ma‘a’l-arsa isâbet eylediği mütehakkık olmağın Ali Efendi bahçesi tarafında vâki‘ fevkānî bir oda ve önünde vâki‘ bir dehliz ve yanında bir kilâr ve bir sagīr oda ve tahtânîde bir matbah ve bir kenîf ve bir sokak kapısı mezbûre Ümmühani’nin nısf hissesine ta‘yîn ve tahsîs olunup ve Salih Çelebi tarafında vâki‘ fevkānî bir oda ve bir mikdâr sofa ve bir mikdâr dehliz ve bir mikdâr cüneyne ve bir bi’r-i mâ mezbûr Ahmed Çelebi’nin nısf hissesine ta‘yîn ve tahsîs ve beyinlerinde alâmât-ı fâsıla vaz‘ olundukda herbirisi bi’t-terâzi kabz ve kabûl etmeğin vâki‘-i hâli mevlânâ-yı mezbûr mahâllinde tahrîr ve ba‘dehû ma‘an ba‘s olunan Mehmed Çelebi b. İbrahim ve Yusuf b. Abdurrahman ile meclis-i şer‘e gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Zilka‘deti’ş-şerîfe li-sene seb‘a ve mie ve elf. [108a] Şuhûdü’l-hâl: Mehmed b. Hızır Mustafa, Attar Ali Beşe b. ( ), Veli Beşe b. ( ), Ahmed b. Mustafa, Mustafa Beşe b. ( ), Salih Çelebi.