İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 450 Hüküm no: 346 Orijinal metin no: [108a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Mardiros v. Bağdasar v. Asvador’un oğlu Artiyon’un babasının mutasarrıf olduğu Ferhad Paşa Vakfı’na ait eve yaptığı müdahaleden men olunması Mahmiye-i İstanbul’da Çerâğī Hasan mahallesinde sâkin iken bundan akdem hâlik olan Mardiros v. Bagdasar nâm zimmînin verâseti zevce-i metrûkesi Menke bt. Ayvaz nâm Nasrâniye ile sulbî kebîr oğulları Artiyon ve Bağdasar ve Kirkor’a ve sagīre kızı Elmas ve li-ebeveyn kız karındaşı merkūme Elmas mahzarında olup ba‘dehû merkūme Elmas ve vasîyy-i hâlika olup verâseti vâlidesi merkūme Menke’ye ve li-ebeveyn er karındaşları merkūmân Aritun ve Kirkor’a munhasıra olduğu şer‘an zâhir ve mütehakkık oldukdan sonra merkūm Aritun mahfil-i kazâda merhûm Ferhad Paşa Vakfı’na bi’l-fi‘il mütevellî olan işbu râfi‘u’l-kitâb Mustafa Efendi b. Receb nâm kimesne mahzarında üzerine da‘vâ ve takrîr-i kelâm edip mahalle-i mezbûrede vâki‘ iki tarafdan Markoz nâm Ermeni mülkü ve bir tarafdan Toran nâm Ermeni mülkü ve bir tarafdan tarîk-i âm ile mahdûd fevkānî ve tahtânî büyût-ı adîdeyi ve sandalcı kârhânesini müştemil mülk menzil babam hâlik-i mezbûrun ile’l-helâk mülkü ve hakkı olup ba‘de’l-helâk bana ve mezbûre Menke’ye ve merkūm Kirkor’a ırsen isâbet ve intikāl eylemiş iken hâlâ mütevellî-i mezbûr menzil-i mahdûd-ı mezkûre bi-gayr-ı hakkın vaz‘-ı yed eylemeğin suâl olunup menzil-i mezkûrda olan hisse-i şâyi‘amdan kasr-ı yed ve bana teslîme tenbîh olunmak matlûbumdur dedikde gıbbe’s-suâl mütevellî-i mezbûr cevâbında fi’l-hakīka menzil-i merkūm hâlik-i merkūmun muhallefâtından olmağla ba‘de helâkihî sekiz sehimden bir sehmi zevcesi mezbûre Menke’ye ve ikişer sehmi oğulları mezbûrûn Aritun ve Bağdasar ve Kirkor’dan herbirine ve bir sehmi kızı mezbûre Elmas’a ırsen isâbet ve intikāl eyledikde mezbûr Mardiros medyûnen hâlik olup ve menzil-i mezkûrdan gayrı terekesi olma[yıp] deyninden mâ‘adâ mezbûrân Bağdasar ve Elmas’ın nafakaya ihtiyâcları olmağla hâlik-i merkūmun zevcesi merkūme Menke işbu hüccet nâtıka olduğu üzere zarûreten deyn ve nafaka için menzil-i merkūmdan mezkûr Kirkor’un hissesinden mâ‘adâ ancak kendiye isâbet eden hisse-i şer‘iyesine asâleten ve sagīrân-ı merkūmân Bağdasar ve Elmas’ın hayatlarında hisse-i şer‘iyelerini dahi izn-i şer‘le vesâyeten merkūm Aritun’a beş yüz guruş semen makbûzuna bin doksan beş Zilka‘detü’ş-şerîfe’sinin beşinci günü bey‘ ve teslîm ol dahi iştirâ ve tesellüm etmekle menzil-i mezbûrun hesâb-ı merkūm üzere sekiz sehimden altı sehmi ırsen ve şirâen merkūm Aritun’un mülk-i mahzı oldukdan sonra sagīr-i merkūm Kirkor’un ber-vech-i muharrer iki sehim hisse-i irsiyesinden mâ‘adâ merkūm Aritun menzil-i mezbûrda ırsen ve şirâen hisse-i şer‘iyesi olan cem‘an altı sehim şâyi‘ine bin doksan altı senesi Şevvali’l-mükerremi’nin yirmi üçünü günü bundan mukaddem vakf-ı mezbûra mütevellî olan Osman Efendi b. Yusuf’a dört yüz esedî guruşa bey‘ ve teslîm edip ol dahi nükūd-ı vakf-ı mezbûrun izdiyâdın akāra tebdîl etmeğe me’zûn olmağla izdiyâd-ı vakf ile bi’t-tevliye vakıf için iştirâ ve teslîm ve meblağ-ı merkūm dört yüz guruşu müdde‘î-i merkūm Aritun’a edâ ve teslîm ol dahi yedinden ahz u kabz etmekle müdde‘i-i merkūm Aritun’un menzil-i mezkûrda olan hisse-i merkūme mutâlebesinden taraf-ı vakf-ı mezbûr yeri olmuşdur deyü def‘le mukābele edicek gıbbe’l-istintâk ve’l-inkâr mütevellî-i mezbûrdan def‘-i mezkûrunu mübeyyene beyyine taleb olundukda udûl-i Müslimînden olup mahmiye-i mezbûrda Demirkapı kurbünde Dâyehatun mahallesi sükkânından Ahmed Ağa b. Hüseyin ve Nasuh Çelebi b. Receb nâm kimesneler li-ecli’ş-şehâde meclis-i şer‘de hâzırân olup isre’l-istişhâd fi’l-hakīka mezbûr Mardiros v. Bağdasar v. Asvador medyûnen hâlik olup menzil-i mezbûrdan gayrı terekesi olmadığından mâ‘adâ mezbûrân Bağdasar ve Elmas’ın nafakaya eşedd-i ihtiyâcları olmağla hâlik-i merkūmun zevcesi merkūme Menke bt. Ayvaz nâm Nasrâni’ye hüccet-i mezbûre nâtıka olduğu üzere zarûret-i deyn ve nafaka için menzil-i merkūmdan mezkûr Kirkor’un hissesinden mâ‘adâ ancak kendiye isâbet eden hisse-i şer‘iyesine asâleten mezbûrân Bağdasar ve Elmas’ın hayatlarında hisse-i şer‘iyelerine dahi izn-i şer‘le vesâyete mezbûr Aritun’a beş yüz guruş semen-i makbûza bin doksan beş senesi Zilka‘desi’nin beşinci günü bey‘ ve teslîm ol dahi iştirâ ve tesellüm etmekle menzil-i mezbûrun hesâb-ı merkūm üzere sekiz sehimden altı sehmi ırsen ve şirâen merkūm Aritun’un mülk-i mahzı oldukdan sonra sagīr-i merkūm Kirkor’un ber-vech-i muharrer iki sehim hisse-i irsiyesinden mâ‘adâ merkūm Aritun’a menzil-i mezbûrda ırsen ve şirâ‘en hisse-i şer‘iyesi olan cem‘an altı sehim şâyi‘ine bin doksan altı senesi Şevvali’l-mükerremi’nin yirmi üçüncü günü bundan akdem vakf-ı merkūma mütevellî olan mezbûr Osman Efendi b. Yusuf dört yüz esedî guruşa bizim huzûrumuzda bey‘ ve teslîm edip ol dahi ber-vech-i muharrer izdiyâd-ı mal-ı vakf-ı mezbûr ile bi’t-tevliye vakıf için ba‘de’l-iştirâ ve tesellüm meblağ-ı merkūmu müdde‘î-i merkūm Aritun’a edâ ve teslîm ol dahi yedinden ahz u kabz ve tesellüm eylemişidi. Biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iye eylediklerinden ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Kirkor’un hissesinden mâ‘adâ müdde‘î-i merkūm Aritun bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis min-Şevvali’l-mükerrem li-sene seb‘a ve mie ve elf. Şuhûdü’l-hâl: İbrahim Çelebi b. (…), Mustafa Çelebi (…) Ahmed b. (…), İbrahim Çelebi b. Mehmed, Ali Çelebi b. Bali, Hüseyin b. Mustafa.