İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 455 Hüküm no: 348 Orijinal metin no: [109a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ali’nin Abdüsselam Efendi’den cebren aldığı parayı ödemesi Mahmiye-i İstanbul’da Sultân Selim Câmi‘-i şerîfi kurbünde Cebecibaşı mahallesinde Şâkir Abdüsselam Efendi b. Nasuh meclis-i şer‘-i şerîf-i enverde sâbıkā Erzurum vâlîsi olan Gürcü Mehmed Paşa’nın kethudâsı olan es-Seyyid Mustafa Ağa b. Ali mahzarında üzerine da‘vâ ve takrîr-i kelâm edip ben bin yüz altı senesinde eyâlet-i mezbûrede Erzincan kazâsında nâibü’ş-şer‘ bulunmağla paşa-yı mûmâ-ileyhin mezbûr es-Seyyid Mustafa Ağa kethudâsı olmağın kazâ-i mezbûra geldiklerinde kazâ-i mezbûrede müfti olan İsmail Efendi’yi erâzil ve eşkıyâ katleylemişler deyü beni zulmen ahz ve habs ve bi-gayr-ı hakkın beş yüz altmış guruşumu ahz u gasb ve kendi mesârifine sarfla istihlâk eylemeğin suâl olunup meblağ-ı mezbûrun bi-tarîkı’d-damân alıverilmesi matlûbumdur dedikde gıbbe’s-suâl ve’l-inkâr mezbûr Abdüsselam Efendi’den ber-vech-i muharrer müdde‘âsına mübeyyene beyyine taleb olundukda udûl-i ahrâr-ı ricâl-i Müslimînden olup kazâ-i mezbûr ahâlîsinden İvaz Çelebi b. Mehmed ve Ali Çelebi b. Mehmed nâm kimesneler li-ecli’ş-şehâde meclis-i şer‘de hâzırân olup istişhâd olunduklarında fi’l-hakīka târih-i mezbûrda mezbûr es-Seyyid Mustafa Ağa paşa-yı mûmâ-ileyhin kethudâsı olmağla kazâ-i mezbûra geldiklerinde mezbûr Abdüsselam Efendi’yi ber-vech-i muharrer zulmen ahz ve habs ve bi-gayr-ı hakkın bizim huzûrumuzda beş yüz altmış guruşunu ahz u gasb ve kendi mesârifine sarfla istihlâk etmişdir deyü herbiri edâ-yı şehâdet şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm meblağ-ı mezbûr beş yüz altmış guruşu mezbûr Abdüsselam Efendi’ye def‘ ve teslîme mezbûr es-Seyyid Mustafa Ağa’ya tenbîh birle mâ hüve’l-vaka‘a bi’t-taleb ketb u tahrîr olundu. Fi’l-yevmi’s-sâmin min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: İbrahim Çelebi b. el-Hâc Ahmed, Mehmed Çelebi b. İdris, Mustafa Çelebi b. Şaban, Ahmed b. Ahmed, Ali b. Bali, Receb b. Süleyman ve gayruhum.