İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 455 Hüküm no: 349 Orijinal metin no: [109a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüsselam Efendi ile Mustafa Ağa’nın alacak davasında sulh oldukları İşbu derûn-ı hüccet-i şer‘iyede ismi mastûr olan mezbûr Abdüsselam Efendi meclis-i şer‘-i şerîf-i enverde merkūm es-Seyyid Mustafa Ağa mahzarında ikrâr ve takrîr-i kelâm edip işbu derûn-ı hüccet-i şer‘iyede mastûr olduğu vech üzere bana edâsına hükm-i şer‘î lâhık olan meblağ-ı mezbûr beş yüz altmış guruşun üç yüz yirmi beş guruşunu mezbûr es-Seyyid Mustafa Ağa [bana] edâ ve teslîm ben dahi ahz u kabz edip ben mâ‘adâsı olan iki yüz otuz beş guruşa müte‘allika âmme-i da‘vâdan merkūm es-Seyyid Mustafa Ağa’nın zimmetini ibrâ-i âmm-ı kātı‘u’n-nizâ ile ibrâ ve ıskāt edip ol dahi bana medfû‘u olan meblağ-ı mezbûr üç yüz yirmi beş guruşa müte‘allika âmme-i da‘vâdan benim zimmetimi ibrâ-i âmm ile ibrâ ve ıskāt eyledi dedikde gıbbe’t-tasdîkı’ş-şer‘î mâ vaka‘a [bi’t-taleb] ketb olundu. Fî 18 min-şehri Rebî‘ülevvel sene [1]108. Şuhûdü’l-hâl: Umdetü’l-mevâliyi’l-izâm Bekrîzâde Ahmed Efendi, zübdetü’l-mevâliyi’l-izâm Yahya Efendi, Sahhâf el-Hâc Hüseyin, es-Seyyid Ali Çavuş, es-Seyyid İbrahim Çavuş, es-Seyyid Mehmed Çavuş, es-Seyyid Halil Çavuş, Simkeş Mustafa.