İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 456 Hüküm no: 350 Orijinal metin no: [109a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ovanes v. Pigal’ın izinsiz olarak yaptığı kömürlüğü yıkması için tenbih olunması Husûs-ı âti’z-zikrin mahâllinde istimâ‘ ve fasl u hasmı bâbında fermân-ı âlî vârid olmağın imtisâlen-leh savb-ı şer‘-i mutahhardan keşif nâibimiz olan Abdullah Efendi b. Ali irsâl olunup ol dahi hâssa mi‘mârlardan Ali Halîfe b. Abdullah ve Mustafa Halîfe b. Abdülmennan ile mahmiye-i İstanbul’da Samatya kapısı dâhilinde el-Hâc Hüseyin mahallesinde vâki‘ merhûm Çoban Çavuş Evkāfı’ndan olup lede’l-ahâlî ve’l-cîrân ma‘lûmü’l-hudûd Ermeni odalarına varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz kimesneler mahzarında akd-i meclis-i şer‘-i şerîf eyledikde zikrolunan odalarda sâkine işbu bâ‘isetü’s-sifr Sara bt. Agop nâm Nasrâniye meclis-i ma‘kûd-ı mezbûrda ve vakf-ı mezbûrun evlâdiyet ve meşrûtiyyet üzere bi’l-fi‘il mütevellîsi olan Mehmed Çelebi b. Osman hazır olduğu hâlde câr-ı mülâsıkım Ovanes v. Pigal nâm zimmî muvâcehesinde üzerine da‘vâ ve takrîr-i kelâm edip mezbûr Ovanes işbu odalar kapısı arasında tarîk-i hâssın sol cânibinde mi‘mârân-ı mezbûrân mesâhaları üzere tûlen dört ve arzen iki bi-hesâb-ı terbî‘i sekiz zirâ‘ kömürlük ihdâs etmekle nazar olunup zikrolunan kömürlük zarar-bîni olmağla kal‘ ve ref‘ etdirilmek matlûbumdur dedikde gıbbe’s-suâl mezbûr Ovanes cevâbında zikrolunan kömürlüğü kadîme muhâlif sonradan ihdâs eyleyip ve izn-i mütevellî dahi olmayıp fuzûlen binâ eylediğini ikrâr ve i‘tirâf eylemeğin mi‘mârân-ı mezbûrân ve Müslimûn-ı mezbûrdan zikrolunan kömürlüğe ba‘de’n-nazar zarar-bîni olup ve kal‘ında dahi cânib-i vakfa kat‘an zararı yokdur deyü herbiri icmâ‘ ve ittifâk ve alâ tarîkı’ş-şehâde haber vermeleriyle zikrolunan kömürlüğü kal‘ ve ref‘ etmek üzere mezbûr Ovanes’e tenbîh eyledikde mevlânâ-yı mezbûr mahâllinde tahrîr ve ma‘an irsâl olunan Ali Çelebi b. Mustafa ve Hasan b. Abdullah ile meclis-i şer‘e gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Süleyman Çelebi b. Abdullah, Abdullah Çelebi b. Ahmed, Musa Efendi b. Hasan, Ahmed Efendi b. Selâm el-imâm, Mustafa Çelebi b. İbrahim, Mehmed Çelebi b. İbrahim.