İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 458 Hüküm no: 352 Orijinal metin no: [109b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakızlı Aleksandıra v. Mike’nin Kostantin v. Doka’da alacağı olduğu Husûs-ı âti’z-zikrin istimâ‘ ve tahrîri için hâlâ Âsitâne-i sa‘âdet’de Sadâret-i uzmâ ve vekâlet-i kübrâ kāimmakām olan düstûr-ı zî-şân ve vezîr-i âsaf-nişân râgibü huyûlü’l-izz ve’l-ikbâl sahibü züyûli’l-mecd ve’l-iclâl sa‘âdetlü Osman Paşa yesserallâhu te‘âlâ mâ yürîd ve mâ yeşâ’ hazretleri ile bu fakīre hitâben Rikâb-ı hümâyûn-ı şevket-makrûnda emr-i şerîf-i cihân-mutâ‘ vârid olmağla imtisâlen-leh <> mahmiye-i İstanbul’da Vâlidehânı’da sâkin Sakızlı Aleksandıra v. Mike nâm zimmî vezîr-i müşârün-ileyh hazretleri huzûr-ı âlîlerinde ma‘kûd meclis-i şer‘-i şerîf-i <<âlîlerinde>> enverde sâbıkā Boğdan beyi olup, mahmiye-i mezbûrede Fenerkapısı kurbünde sâkin Kostantin v. Duka muvâcehesinde üzerine da‘vâ ve takrîr-i kelâm edip târih-i kitâbdan otuz yedi ay mukaddem medîne-i Edirne’de sâkin olduğu kal‘a dâhilinde vâki‘ menzilde levn ve zirâ‘ları beynimizde ma‘lûm yedimden iştirâ ve kabz eylediği çuka ve kumaş ve dîbâ bahâlarından mezkûr Kostantin zimmetinde cem‘an üç bin yüz yirmi guruş hakkım olup hatta târih-i mezbûrda menzil-i mezkûrda ber-vech-i muharrer yedimden iştirâ ve kabz eylediği eşyâ-i mezkûre bahâlarından zimmetinde bana edâsı lâzım ol mikdâr deyni olduğuna alâ ruûsi’l-işhâd ikrâr ve i‘tirâf ve işhâd edip deyn-i mezbûru nâtık ve imzâ ve hatmini hâvî kendi lisânımız üzere işbu deyn temessükünü dahi vermişiken meblağ-ı mezbûru taleb eylediğimde bana edâdan imtinâ‘ eder hâlâ suâl olunup meblağ-ı mezbûru bana edâya mezbûr Kostantin’e tenbîh olunmak matlûbumdur dedikde gıbbe’s-suâl mezbûr Kostantin husûs-ı mezbûru bi’l-külliye inkâr edicek müdde‘î-i mezbûr Aleksandıra müdde‘âsına mutâbıka beyyine taleb olundukda tüccârdan olmağla târih-i merkūmdan medîne-i Edirne’de sâkinler olup hâlâ zikrolunan Vâlidehânı’nda sâkinler olan Manol v. Todori ve Anastaş v. İsayi ve Corciya v. Vişani nâm zimmîler li-ecli’ş-şehâde meclis-i ma‘kûd-ı mezkûrda hâzırûn olup isre’l-istişhâd fi’l-hakīka târih-i kitâbdan otuz yedi ay mukaddem medîne-i Edirne’de kal‘a dâhilinde bi-tarîk sâkin olduğu menzilde müdde‘î-i mezbûr Aleksandri’ya yedinden iştirâ ve kabz eylediğim çuka ve kumaş ve dîbâ bahâlarından üç bin yüz yirmi guruş zimmetimde lâzımü’l-edâ ve vâcibü’l-kazâ deynim var deyü işbu mezbûr Kostantin bizim huzûrumuzda ikrâr ve i‘tirâf edip bizi eşhâd ve işbu temessükü vermişidi. Hâlâ meblağ-ı mezbûru merkūm Kostantin’den müdde‘î-i mezbûr Aleksandıra için hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mezbûr Kostantin müdde‘î-i mezbûra hakīkatda deynim olmayıp eşyâ-i mezbûre semenlerinden üç bin yüz yirmi guruş zimmetimde edâsı lâzım deynimdir deyü târih-i merkūmda ikrâr ve i‘tirâf ve zikrolunan [110a] temessükü muvâza‘aten vermişidim deyicek mukaddemâ husûs-ı mezbûru bi’l-külliye inkâr edip müdde‘î-i mezbûr dahi müdde‘âsına ba‘de’l-isbât mezkûrun muvâza‘a iddi‘âsına şer‘an i‘tibâr olunmayıp mûcebince ba‘de’l-hükm ve’t-tenbîh mâ vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: A‘lemü’l-ulemâ’i’l-izâm Ali Efendi kādı bi-medîne-i Edirne sâbıkā, umdetü’l-emâcid ve’l-ekârim Mehmed Ağa ser-sekbânân-ı Dergâh-ı âlî, umdetü’l-erbâbü’t-tahrîr Mehmed Beyefendi vekîl-i reisülküttâb, umdetü’l-erbâbü’l-azîz Yusuf Efendi tezkire-i evvel, zübdetü ashâbü’t-tastîr Hâfız Efendi tezkire-i [sânî], umdetü’l-emâcid ve’l-a‘yân Mehmed Ağa ser-çavuşân, fahrü’l-eşbâh ve’l-a‘yân Muhzır Mehmed Ağa, fahrü’l-akrân Ali Ağa kethudâ-i bevvâbân-ı vezîr-i ileyh, fahrü’l-a‘yân Toygun Mustafa Ağa muhtesib-i Âsitâne, fahrü’l-kuzât Mustafa Efendi nâib-i recül.