İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 459 Hüküm no: 353 Orijinal metin no: [110a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gonca bt. Abdullah ve validesi Gülistan bt. Abdullah’ın hürre oldukları Mahmiye-i İstanbul’da Koca Mustafapaşa mahallesi sükkânından işbu râfi‘u’l-kitâb Tarakçı Mehmed b. Abdullah nâm kimesne meclis-i şer‘-i şerîf-i enverde mahalle-i mezbûre sâkinlerinden iken bundan akdem vefât eden Mehmed Çelebi b. Mustafa b. Receb’in verâseti zevce-i metrûkesi Rukiye bt. Mehmed nâm hatun ile sulbî sagīr oğlu Mustafa ve sulbiye sagīre kızı Ayşe’ye münhasıra olduğu şer‘an zâhir ve tahakkuk oldukdan sonra kendi tarafından asıl ve sagīrân-ı mezbûrânın vâlideleri ve vasîleri olmağla tereke-i müteveffât-i mezbûra asâleten ve vesâyeten vâzı‘u’l-yed olan mezbûre Rukiye Hatun tarafından husûs-ı âti’z-zikre vekîl-i müseccel olan Mustafa Çelebi b. Mahmed mahzarında üzerine da‘vâ ve takrîr-i kelâm edip müteveffât-i mezbûr Mehmed Çelebi bundan akdem hâl-i hayatında kendinden mukaddem fevt olan Ayşe Hatun b. Abdullah b. Abdurrahman’ın terekesinden iştirâ edip yedinde câriye-i mümlûkesi olmak üzere işbu açık kaşlı, elâ gözlü, tahmînen on iki yaşlarında Rusiyyetü’l-asl Gonca bt. Abdullah’ı yetmiş beş guruşa bana bey‘ ve teslîm ben dahi iştirâ ve tesellüm ve def‘-i semeni mezbûra verip yedimde iken mezbûre Gonca ben ve vâlidem işbu hâzıra bi’l-meclis Gülistan bt. Abdullah mezbûre <> Ayşe Hatun’un câriye-i memlûkesi olduğumuz hâlde mezbûre Ayşe Hatun hâl-i hayatında vâlidem-i mezbûre Gülistan ile beni mâlından tahrîr ve i‘tâk edip bende sâir harâir-i asliyât gibi hürre olduğumdan sonra mezbûre Ayşe fevt olup sadr-ı kebîr oğlu ve hasren vârisi olan bâyi‘-i mezbûr Mehmed Çelebi dahi vâlidesi mezbûrenin beni tahrîr ve i‘tâk eylediğini alâ ruûsi’l-işhâd ikrâr ve i‘tirâf etmişdir deyü târih-i kitâbdan yirmi gün mukaddem hâkim-i muvakki‘-i sadr-ı kitâb tûbâ-lehû ve hüsnü-meâb hazretleri huzûrunda da‘vâyı ben dahi inkâr eylediğimde mezbûre Gonca müdde‘âsına udûl-i Müslimînden ve mahalle-i mezbûre sükkânından Mustafa Çelebi b. Abdullah nâm kimesne ile Hoca Râbia Hatun bt. Ahmed ve Safiye Hatun bt. Yusuf ve İsmihan bt. Abdullah şehâdetleriyle benim muvâcehemde şer‘an isbât etmekle mezbûrenin ıtkına hükm-i hâkimü’ş-şer‘î lâhık olup sebîli tahliye olunmağla ben dahi müvekkile-i mezbûreye mürâca‘at edip müteveffâ-i mezbûr Mehmed Çelebi’ye semeni olmak üzere medfû‘um olan meblağ-ı mezbûr yetmiş beş guruş terekesinden taleb eylediğimde bana teslîmden imtinâ‘ eder hâlâ suâl olunup meblağ-ı mezbûru tereke-i müteveffâ-i mezbûrdan bana edâya vekîl-i mezbûra tenbîh olunmak matlûbumdur dedikde gıbbe’s-suâl vekîl-i mezbûr cevâbında müvekkilesi mezbûre Rukiye’nin tereke-i müteveffâ-i mezbûra vâzı‘u’l-yed olduğun ikrâr mâ‘adâ-yı mezkûru bi’l-külliye inkâr edicek müdde‘i-i mezbûrdan müdde‘âsına beyyine taleb olundukda udûl-i Müslimînden olup mahmiye-i mezbûre sükkânından Mehmed Çelebi b. Abdullah ve Hüseyin Çelebi b. Mustafa nâm kimesneler li-ecli’ş-şehâde meclis-i şer‘de hâzırân olup isre’l-istişhâd işbu mezbûre Gonca’yı müteveffâ-i mezbûr Mehmed Çelebi b. Mustafa b. Receb hâl-i hayatında vâlidesi mezbûre Ayşe Hatun bt. Abdullah b. Abdurrahman’ın terekesinden iştirâ edip yedinde câriye-i memlûkesi olmak üzere müdde‘i-i mezbûr Tarakçı Mehmed’e yetmiş beş guruşa bey‘ ve teslîm ol dahi iştirâ ve tesellüm ve def‘-i semen-i mezbûr edip yedinde iken mezbûr Gonca ben ve vâlidem Gülistan bt. Abdullah mezbûre Ayşe’nin câriye-i memlûkesi olduğumuz hâlde mezbûr Ayşe Hatun hâl-i hayatında vâlidem mezbûre Gülistan ile beni tahrîr ve i‘tâk edip ben sâir harâir-i asliyât gibi hürre olduğumda sonra mezbûre Ayşe fevt olup sadrî kebîr oğlu ve hasren vârisi olan mezbûr Mehmed Çelebi vâlidesi mezbûrenin beni tahrîr ve i‘tâk eylediğini alâ ruûsi’l-işhâd ikrâr ve i‘tirâf dahi etmişdir deyü târih-i kitâbdan yirmi gün mukaddem hâkim-i müşârün-ileyh hazretleri huzûrunda da‘vâ edip mezbûr Tarakçı Mehmed dahi inkâr etmekle merkūm Gonca müdde‘âsına udûl-i Müslimînden ve mahalle-i mezbûr sükkânından Mustafa Çelebi b. Abdullah ve Hoca Râbia Hatun bt. Abdullah ve Safiye Hatun bt. Yusuf ve İsmihan Hatun bt. Abdullah şehâdetleriyle şer‘an isbât edip [110b] mezbûrenin ıtkına hükm-i hâkimü’ş-şer‘î lâhık ve sebîli tahliye olundu ve ber-vech-i muharrer hürriyetine hükm-i hâkimü’ş-şer‘î lâhık olup sebîli tahliye olunan bi-aynihâ mezbûre Mehmed Çelebi’nin bey‘ eylediği mevsûfe-i mezbûredir biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın ba‘de’t-tahlîfi’ş-şer‘i mûcebiyle ba‘de’l-hükm mâ vaka‘a bi’t-taleb ketb olundu. Fî gurreti Zilhicceti’ş-şerîfe li-sene seb‘a ve mie ve elf. Şuhûdü’l-hâl: Mehmed Çelebi b. İbrahim, İbrahim Çelebi b. Ahmed, Ali Beşe çukadâr, Receb b. Osman, Mustafa b. Şaban.