İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 462 Hüküm no: 355 Orijinal metin no: [111a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ahmed b. Yusuf’un İbrahim Ağa b. Mehmed’e ev satışı Husûs-ı âti’z-zikrin mahâllinde tahrîri iltimâs olunmağın cânib-i şer‘-i kadîmden Mevlânâ es-Seyyid İbrahim Efendi b. Ahmed Efendi Dârü’s-saltanati’s-seniyye-i Kostantıniyye el-mahmiyede Alipaşa-yı Atîk mahallesinde hâlâ ser-mi‘mârân-ı hâssa umdetü’l-eşbâh ve’l-a‘yân el-Hâc Hasan Ağa b. Hüseyin’in menziline varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i şerîf etdikde mahmiye-i mezbûrede Yenibahçe kurbünde Arpaemini mahallesinde sâkin sâbıkā kapı ağası olan fahrü’l-e‘âlî hâviyyü’l-meâli Mustafa b. Ahmed b. Yusuf tarafından husûs-ı âti’l-beyâna vekîl olduğu mûmâ-ileyh el-Hâc Hasan Ağa ve Mustafa Ağa b. Fazlı şehâdetleriyle şer‘an sâbit olan Yahya Çelebi b. Mehmed meclis-i ma‘kûd-ı mezbûrda hâlâ Ali Paşa-yı Atîk mütevellîsi fahrü’l-a‘yân el-Hâc İbrahim Ağa b. Mehmed mahzarında bi’l-vekâle ikrâr-ı tâm ve takrîr-i kelâm edip zikri âtî akdin sudûruna değin müvekkilim mûmâ-ileyhin silk-i mülkünde münselik olup mahmiye-i mezbûrda Hüseyin Ağa mahallesinde vâki‘ bir tarafdan Medîne-i münevvere Vakfı ve bir tarafdan el-Hâc Receb veresesi mülkleri ve bir tarafdan Küçük Ayasofya Câmi‘-i şerîfi ve bir tarafdan tarîk-i âm ile mahdûd dâhiliye ve hâriciyede büyût-ı adîdeyi muhtevî mülk menzili bi-cümle tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı bât-ı sahîh-i şer‘î ile mezbûr el-Hâc İbrahim Ağa’ya bin beş yüz guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl etdiğinden sonra semeni olan meblağ-ı mezbûr bin beş yüz guruşu müvekkilim mezbûr Mustafa Ağa mezbûr el-Hâc İbrahim Ağa yedinden tamamen ahz u kabz eyledi. Ba‘de’l-yevm menzil-i mahdûd-ı mezbûr merkūm el-Hâc İbrahim Ağa’nın mülk-i müşterâsı ve mülk-i mahzı olup müvekkilim mûmâ-ileyh Mustafa Ağa’nın kat‘a alâka ve dahli kalmamışdır. Keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘-i hâli mevlânâ-yı mezbûr mahâllinde tahrîr ba‘dehû ma‘an ba‘s olunan Ömer Çelebi b. Muharrem ve Mehmed b. Ahmed ile meclis-i şer‘e gelip alâ vukū‘ihî inhâ ve tahrîr etmeğin mâ vaka‘a bi’t-taleb ketb olundu. Fî 28 min-Zilka‘deti’ş-şerîfe sene 1107. Şuhûdü’l-hâl: Umdetü erbâbü’t-tahrîr ve’l-kalem şehremini vekîli Ömer Efendi, fahrü’l-emâcid ve’l-ekârim çavuşbaşı vekîli Mehmed Ağa, fahrü’l-eşbâh Ömer Efendi b. Muharrem, el-Hâc Ahmed Ağa b. Mahmud, Mehmed Çelebi b. Kâmil, Mehmed Efendi kâtib-i mi‘mâr.