İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 465 Hüküm no: 357 Orijinal metin no: [111b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. İsmail ile Haffaf Ali Çelebi b. Abdullah’ın aralarındaki alacak davasında anlaştıkları Mahmiye-i İstanbul’da Sofular mahallesinde sâkin Haffâf Ali Çelebi b. Abdullah meclis-i şer‘-i şerîf-i enverde medîne-i Üsküdar muzâfâtından Adalar nâhiyesine tâbi‘ Viran nâm karye sükkânından es-Seyyid Mehmed Çelebi b. İsmail mahzarında ikrâr-ı tâm ve takrîr-i kelâm edip târih-i kitâbdan bir sene mukaddem mezbûr es-Seyyid Mehmed Çelebi’ye mâlımdan iki yüz elli guruşumu ikrâz ve teslîm ve yine eşyâ-i memlûkemden işbu iki sîm kılıç ve bir sîm gaddâre ve üç siyah kabzalı hançer ve on üç paftalı bir cevâhir kuşak ve bir sâde kalkan ve beş zirâ‘ kırmızı Londrine çuka ve iki Mushaf-ı şerîf ve bir kaba destâr ve iki aded köhne serâser ma‘kad ve bir Hind alacamı bi-safkatin vâhidetin yedi yüz elli guruşa bey‘ ve temlîk ol dahi ber-vech-i muharrer iktirâz ve iştirâ ve temellük ve kabz etdikden sonra cem‘an meblağ-ı mezbûr bin guruşa işbu hazır bi’l-meclis İbrahim Ağa b. İsmail kefîl olduğundan sonra meblağ-ı mezbûr bin guruşa mezbûr es-Seyyid Mehmed Çelebi’den mukaddemâ da‘vâ etdiğimde ol dahi ber-vech-i muharrer meblağ-ı mezbûr bin guruş bana deyni olduğunu ikrâr lâkin eşyâ-i mezkûrenin a‘yânı mevcûde olup karz zımnında ber-vech-i muharrer bey‘-ı mezbûrun fesâdına binâen meblağ-ı mezbûr iki yüz elli guruş ile eşyâ-i mezkûreyi bana reddetmek üzere da‘vâ ve müdde‘âsını isbâtdan âciz olmağla bi’t-taleb bana yemîn teklîf olundukda ben dahi nükûl etmekle mûcebiyle bey‘-ı mezkûrun fesâdına hükm-i şer‘i lâhık olmuşidi. el-Hâletü hâzihî meblağ-ı mezbûr iki yüz elli guruş ile eşyâ-i muharrere-i mezkûreyi bi’t-tamam bana def‘ ve teslîm ben dahi yedinden ahz u kabz eyledim ba‘de’l-yevm mezbûrân es-Seyyid Mehmed Çelebi ve kefîl-i mezbûr İbrahim Ağa ile vechen mine’l-vücûh da‘vâm ve nizâ‘ım kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe li-sene [1]107. Şuhûdü’l-hâl: [112a] İbrahim Çelebi b. Ahmed, Mehmed Çelebi b. İdris, Ali Çelebi b. Bali, Mehmed Çelebi b. Mehmed, Küçük İbrahim Çelebi b. Mehmed, Ahmed b. Ahmed, Ali b. Bali.