İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 466 Hüküm no: 358 Orijinal metin no: [112a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Mihal v. Rastokos’un Siyavuş Paşa’nın kızı Emine Hanım’a dükkân satışı Husûs-ı âti’z-zikrin mahâllinde ketb u tahrîri için savb-ı şer‘-i enverden bi’t-taleb irsâl olunan Ebûbekir Efendi b. el-Hâc Abdülkerim, vezîr-i a‘zam oldukdan sonra vedâ‘-ı âlem-i fânî eden merhûm Siyavuş Paşa’nın kerîme-i menkûhası umdetü’l-muhadderât zübdetü’l-muvakkarât Emine Hanım mahmiye-i İstanbul’da Lâlezâde kurbünde sâkine olduğu saraya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahmiye-i mezbûrede Yedikule kurbünde Mirâhur mahallesinde sâkin Kürkçü Mihal v. Rastokos nâm zimmî meclis-i ma‘kūd-ı mezbûrda mûmâ-ileyhâ Emine Hanım tarafından Husûs-ı âti’z-zikre vekîl olduğu İbrahim Ağa b. Hasan ve Hamza Bey b. Abdullah şehâdetleriyle şer‘an sâbit olan İbrahim Ağa b. Yunus mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup zikrolunan Mirâhur mahallesinde bir tarafı mûmâ-ileyhâ Emine Hanım tasarrufunda olan habbâ[z] fırını ve bir tarafdan Zümrüd bt. Bali nâm Nasrâniye mülkü ve bir tarafdan İnebalı nâm zimmî mülkü ve bir tarafdan tarîk-i âm ile mahdûd bozahâne yeri demekle ma‘rûf bir anbâr ve bir sakf ve iki incir ağacı ve bir taş duvarı müştemil birbirine muttasıl biri kalâycı ve biri attar ve bir[i] turşucu ki cem‘an üç bâb mülk dükkânlarımı bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafından îcâb ve kabûlü hâvî bey‘-ı bât-ı sahîh-i şer‘î ile vekîl-i mezbûr İbrahim Ağa’ya üç yüz kıt‘a aynî esedî guruşa bey‘ ve temlîk ve teslîm ol dahi müvekkilesi mûmâ-ileyhâ Emine Hanım için bi’l-vekâle iştirâ ve kabûl ve temellük ve tesellüm eyledikden sonra semeni olan meblağ-ı mezbûr üç yüz kıt‘a esedî guruşu işbu meclis-i mezbûrda vekîl-i mezbûr İbrahim Ağa yedinden tamamen ahz u kabz eyledim. Fîmâ-ba‘d zikrolunan üç bâb dükkân ve arsa cemî‘-i tevâbi‘i ve levâhıkı ile müvekkile-i mûmâ-ileyhâ Emine Hanım’ın mülk-i müşterâsı olmuşdur. Asla alâkam kalmadı keyfe mâ teşâ mutasarrıfe olsun dedikde gıbbe’t-tasdîkı’ş-şer‘î vâki‘-i hâli mezbûr Ebûbekir Efendi mahâllinde ketb u tahrîr edip ba‘dehû ma‘an ba‘s olunan İbrahim Çelebi b. Ahmed ve Mehmed b. Ahmed ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’l-â‘şir min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: İbrahim Ağa b. Hasan, Mustafa Efendi b. Mehmed, es-Seyyid Abdullah b. es-Seyyid Hasan el-imâm, Mehmed Çelebi b. İbrahim, İbrahim Çelebi b. İsmail, es-Seyyid Mustafa Efendi b. Mehmed, Hamza Bey b. Abdullah, Hasan Çelebi b. Ali, Mehmed Çelebi b. İbrahim, Mustafa Efendi b. el-Hâc Ahmed, Ahmed Çelebi b. Abdullah, Çavuş Mehmed el-muhzır.