İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 467 Hüküm no: 359 Orijinal metin no: [112a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi b. Ömer’e olan borcunu ödemesi için Mustafa b. Ahmed’e tenbihde bulunulması Medîne-i Hazret-i Ebû Eyüb el-Ensârî -radiyallâhü anhü’l-bârî-’de Zal Mahmudpaşa mahallesi sükkânından Ali Çelebi b. Ömer nâm kimesne dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i âlîde mahmiye-i İstanbul’da Bostânî Ali mahallesinde sâkin el-Hâc Mustafa b. Ahmed nâm kimesne mahzarında üzerine da‘vâ ve takrîr-i kelâm edip mezbûr el-Hâc Mustafa zimmetinde cihet-i karz-ı şer‘îden ve yedimden iştirâ ve kabz eylediği beynimizde ma‘lûm emti‘a-i mütenevvi‘a bahâlarından min-haysü’l-mecmû‘ iki yüz on guruş hakkım olup hatta târih-i kitâb senesi Cumâdelûlâsı’nın on ikinci günü ber-vech-i muharrer cihet-i karz-ı şer‘îden ve emti‘a-i mütenevvi‘a bahâlarından cem‘an iki yüz on guruş zimmetinde bana edâsı lâzım deyni olduğunu mezbûr el-Hâc Mustafa alâ ruûsi’l-işhâd ikrâr ve i‘tirâf ve işhâd dahi edip hat ve hatmini hâvî ve deyn-i mezbûru nâtık işbu temessükü dahi vermişiken hâlâ taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr el-Hâc Mustafa cevâbında meblağ-ı mezbûr Hâlim Mehmed nâm kimesnenin deyni olmağla cihet-i karz-ı şer‘iyeden ve emti‘a-i mütenevvi‘a bahâlarından müdde‘i-i mezbûra iki yüz on guruş zimmetimde edâsı lâzım deynimdir deyü târih-i mezbûrda ikrâr ve i‘tirâf edip zikrolunan temessükü vermişidim lâkin ikrâr-ı mezkûrumda kâzibim deyicek fi’l-hakīka mezkûr el-Hâc Mustafa ikrâr-ı mezkûrda kâzib ve kendi da‘vâ-yı meşrûhasında mubtıl olmadığına müdde‘i-i mezbûr Ali Çelebi’ye bi’t-taleb yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle meblağ-ı mezbûr iki yüz on guruşu müdde‘i-i mezbûr Ali Çelebi’ye edâ ve teslîme merkūm el-Hâc Mustafa’ya tenbîh olunup mâ vaka‘a bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: [112b] Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Mehmed Ağa ser-çavuşân, fahrü’l-akrân ve’l-ikfâ Muhzır Mehmed Ağa, el-Hâc Mehmed Çavuş b. ( ), İbrahim Çavuş b. ( ), Halil Efendi b. Mehmed, Mustafa Efendi nâib-i recül, el-Hâc İbrahim b. Mehmed, Celeb Ahmed Bey b. Mehmed, Muslu Çelebi b. Osman, Abdullah Ağa b. Abdullah, İsmail Bey b. Mehmed.