İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 468 Hüküm no: 360 Orijinal metin no: [112b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Mehmed’e olan borcunu ödemesi için Mustafa b. Ahmed’e tenbihde bulunulması Mahmiye-i İstanbul’da Kefeli mahallesinde sâkin işbu râfi‘u’l-kitâb el-Hâc İbrahim b. Mehmed nâm kimesne dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde mahmiye-i mezbûrede Bostânî Ali mahallesinde sâkin el-Hâc Mustafa b. Ahmed nâm kimesne mahzarında üzerine da‘vâ ve takrîr-i kelâm edip mezbûr el-Hâc Mustafa bundan akdem sefer-i hümâyûnda iken menzilinde olan iyâlinin nafaka ve kisveleri’çün emriyle kendiye bi-şarti’r-rücû‘ ben mâlımdan yüz kırk guruş harc ve sarf eylediğimden sonra târih-i kitâb senesi Cumâdelûlâsı’nın on dördüncü günü sefer-i hümâyûndan gelip mezbûrile hesâb gördüğümüzde ber-vech-i muharrer masrûfumu mukırr u mu‘terif olup zimmetinde bana edâsı lâzım deyni olduğundan mâ‘adâ elli dokuz buçuk guruşu dahi benden iktirâz ve kabz edip ciheteyn-i mezbûreteynden mezbûr el-Hâc Mustafa zimmetinde yüz doksan buçuk guruş hakkım müctemi‘ olmağla deyn-i mezbûru nâtık işbu temessükü dahi vermişidim hâlâ taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr el-Hâc Mustafa cevâbında fi’l-hakīka kazıyye bâlâda tafsîl ve beyân olunan vech üzere olup müdde‘i-i mezbûr el-Hâc İbrahim ben sefer-i hümâyûnda iken menzilimde olan ıyâlımın nafaka ve kisveleri’çün emrimle bana bi-şarti’r-rücû‘ mâlımdan yüz kırk guruş sarf etmekle meblağ-ı mezbûr yüz kırk guruşu ve kendiden iktirâz ve kabz eylediğim elli buçuk guruş ki cem‘an yüz doksan dokuz buçuk guruşu müdde‘i-i mezbûr el-Hâc İbrahim zimmetimde lâzımü’l-edâ ve vâcibü’l-kazâ deynimdir deyü bi-tav‘ihiikrâr ve i‘tirâf etmeğin alâ mûceb-i i‘tirâfihî meblağ-ı mezbûr yüz doksan dokuz buçuk guruş müdde‘î-i mezbûra edâ ve teslîme merkūm el-Hâc Mustafa’ya tenbîh olunup mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, umdetü’l-eşbâh ve’l-a‘yân Muhzır Mehmed Ağa, Celeb Ahmed Bey b. Mehmed, Muslu Çelebi b. Osman, Abdullah Ağa b. Abdullah, el-Hâc İbrahim b. Mehmed.