İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 469 Hüküm no: 361 Orijinal metin no: [112b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamer Hatun Vakfı’na ait evin Altuncuzâde Mustafa Efendi b. Nimetullaha tahsis edilmesi Ashâb-ı hayrâtdan merhûme Kamer Hatun’un süknâsı ulemâdan bir recül-i sâliha şürût-ı vakfı olup mahmiye-i İstanbul’da Ahmed Ağa mahallesinde vâki‘ bir tarafı Camcızâde Mehmed Efendi mülkü ve bir tarafı Ahmed Ağa Vakfı ve bir tarafı mahalle-i mezbûre imâmına mevkūfe menzil ve bir tarafı tarîk-i hâss ile mahdûd menzillin ber-mûceb-i şart-ı vâkıfe tevcîh-i hâkimü’ş-şer‘le mutasarrıf olan Kahveci Abdülva[hha]b Efendi b. Veliyüddin fevt olup süknâ-i menzil-i mahdûd-ı mezbûr mahlûle ve işbu bâ‘isü’l-kitâb Altuncuzâde eş-Şeyh Mustafa Efendi b. Nimetullah süknâya muhtâc ve her vechile muhîl ve müstahık olduğunu sikāt-ı makbûletü’l-kelimât-ı müşgîn-nikāb tevkī‘-i refî‘-i müstetâbı şeref-yâb olan hâkim-i ma‘delet-nisâb [tûbâ]-lehü ve hüsn me’âb hazretleri dahi süknâ-i menzil-i mezkûru ber-mûceb-i şart-ı vâkıfe kıbel-i şer‘den mûmâ-ileyh eş-Şeyh Mustafa Efendi’ye tevcîh buyurup tasarrufu için işbu vesîka bi’t-taleb ketb olundu. Fi’l-yevmi’s-sâlis aşer min-Zilhicceti’ş-şerîfe sene [1]107. Şuhûdü’l-hâl: Umdetü’l-ulemâi’l-izâm Rıfat Mehmed Efendi el-kadı be-Kostantıniyye sâbık, umdetü’l-mevâliyyi’l-fihâm Seyfzâde es-Seyyid İbrahim Efendi el-kadı be-medîne-i Selanik sâbık, umdetü’l-vâ‘izîn eş-Şeyh Ali Efendi vâ‘iz-i merhûm Sultân Selim Hân, umdetü’l-meşâyih eş-Şeyh Manevî Efendi, umdetü’l-müderrisîni’l-kirâm Mâhir Abdullah Efendi, Mustafa Efendi b. Mehmed, fahrü’l-akrân Ebûbekir Ağa ser-gulâm-ı bâkī.