İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 469 Hüküm no: 362 Orijinal metin no: [113a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Bey b. Cafer b. Abdullah’ın varislerinin Hasan Bey b. Abdullah üzerine açtıkları alacak davasını delillendiremedikleri Bundan akdem Basra vâlîsi oldukdan sonra vedâ‘-ı âlem-i fânî eden merhûm Halil Paşa’nın hazîne kâtibi olmağla nefs-i Basra’da fevt olan Halil Bey b. Cafer b. Abdullah’ın verâseti Âişe Hatun bt. Ali ile li-ebeveyn er karındaşı olan Mehmed ve li-ebeveyn kız karındaşı Fâtıma Hatun’a munhasıra olduğu şer‘an zâhir ve müte‘ayyen oldukdan sonra zâtını ma‘rifet-i şer‘iye ile ârifân olan Hasan Çelebi b. Mehmed ve Ahmed Ağa b. Mehmed ta‘rîfleri ile mu‘arrefe olan mezbûre Âişe Hatun asâleten ve kendi tarafından asil ve mezbûre Fâtıma tarafından husûs-ı âti’z-zikre vekîl olduğu mezbûrenin dahi zâtını ârifân mezbûr Hasan Çelebi ve Ahmed Ağa şehâdetleriyle sâbit olan mezbûr Mehmed asâleten ve vekâleten dîvân-ı kāimmakām-ı hazret-i sadrazamîde ma‘kūd meclis-i şer‘-i şerîfde paşa-yı mûmâ-ileyhin hazînedârı olan işbu rafi‘ü’l-kitâb Hasan Bey b. Abdullah mahzarında üzerine da‘vâ ve takrîr-i kelâm edip mevrûsumuz Halil Bey’in cihet-i deyn-i şer‘iyeden paşa-yı mûmâ-ileyh zimmetinde iki yüz yirmi beş guruş hakkı olmağla mezbûr Halil Bey meblağ-ı mezbûru paşa-yı mûmâ-ileyhden taleb ve da‘vâ ve ahz u kabz ve kendiye îsâle hâl-i hayatında işbu mezbûr Hasan Bey’i vekîl edip ve deyn-i merkūm nâtık paşa-yı mûmâ-ileyhin temessükünü merkūma teslîm ol dahi ba‘de’l-kabûl meblağ-ı mezbûru paşa-yı mûmâ-ileyhden bi’l-vekâle ahz u kabz ve kendi mesârifine sarfla istihlâk eylediğinden sonra mevrûsumuz mezbûr Halil Bey meblağ-ı mezbûru kable’l-ahz fevt olmağla ırsen bize isâbet etmeğin hâlâ suâl olunup meblağ-ı mezbûru bize edâya mezbûr Hasan Bey’e tenbîh olunmak matlûbumuzdur dediklerinde gıbbe‘s-suâl ve akībe’l-inkâr müdde‘iyân-ı mezbûrândan müdde‘âlarına beyyine taleb olundukda ıtyân-ı beyyineden ızhâr-ı aczile istihlâf etmeğin fi’l-hakīka meblağ-ı mezbûr iki yüz yirmi beş guruş mûmâ-ileyh Halil Paşa’dan bi’l-vekâle azh u kabz etmeyip ol vechile meblağ-ı mezbûrun verese-i mezbûrûna edâsı üzerine lâzım gelmediğine mezbûr Hasan Bey’e yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle müdde‘iyân-ı mezbûrâna bilâ-tenbîh bî-vech mu‘ârazadan men‘ olunup mâ hüve’l-vâki‘ bi’t-taleb ketb u tahrîr olundu. Fi’l-yevmi’s-sâdis min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’r-rakām tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, fahrü’l-eşbâh ve’l-a‘yân Mehmed Ağa ser-çavuşân, fahrü’l-akrân el-Hâc Abdurrahman Ağa tâbi‘-i mûmâ-ileyh, es-Seyyid Hasan Bey b. Mehmed, Hasköylü Mehmed Çavuş, fahrü’l-akrân Ömer Ağa, el-Hâc Halil Efendi b. Mehmed, Ali Beşe çukadâr ve gayruhum.