İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 470 Hüküm no: 363 Orijinal metin no: [113a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Ramazan hürre olduğu Vech-i âtî üzere kıbel-i şer‘den me’zûn olan açık kaşlı, elâ gözlü, orta boylu bâ‘iset-ü hâze’l-kitâb Emine bt. el-Hâc Ramazan dîvân-ı kāimmakām-ı hazret-i sadrazamîde ma‘kūd meclis-i şer‘-i şerîf-i enverde rakīka olmak üzere kendiye vâzı‘u’l-yed olan esirci tâifesinden Ahmed Beşe b. Ebûbekir nâm kimesne mahzarında üzerine da‘vâ ve takrîr-i kelâm edip ben vilâyet-i Anadolu’da olup hürretü’l-asl olan Fâtıma bt. Abdullah nâm hatundan mütevellide sulbiye kızı olup bana ve ebeveynime kat‘a rıkk târî olmamış hürretü’l-asl iken mezbûr Ahmed Beşe rakīka olmak üzere bana vaz‘-ı yed edip hâssa veznedârbaşı Muslu Ağa b. Mehmed’e semen-i ma‘lûme beni bey‘ ve teslîm ol dahi iştirâ ve tesellüm ve beni istifrâş ve ihbâl eyledikden sonra ben ber-vech-i muharrer hürriyetimi da‘vâ sadedinde olduğumda akd-i mezbûru beyinlerinde fesh ve ikāle edip beni mezbûr Muslu Ağa tarafından vekîl olduğu Ahmed Çelebi b. Mustafa ve Mustafa Efendi b. Mehmed şehâdetleriyle şer‘an sâbit olan işbu hazır bi’l-meclis Halil Bey b. Şaban yedinden alıp ke’l-evvel rakīka olmak üzere bana vaz‘-ı yed eder hâlâ suâl olunup mezbûrûn üzerime de kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûr Ahmed Beşe cevâbında fi’l-hakīka kazıyye vech-i muharrer üzere olup mevsûfe-i mezbûre Emine zikrolunan Bender-i Kili kasabasında sâkin hürrü’l-asl olan mezbûr el-Hâc Ramazan [113b] firâşından hâsıla ve zevce-i menkûhası olan Fâtıma Hatun’dan mütevellide sulbiye kızı olup kendiye ve ebeveynine kat‘a rık târî olmamış hürretü’l-asl iken müvekkil-i mezbûr Muslu Ağa refîka olmak üzere bey‘ ve teslîm ol dahi ba‘de’l-iştirâ mevsûfe-i mezbûre hürriyetini da‘vâ sadedinde olmağla akd-i mezbûru fesh ve ikālete ve mevsûfe-i mezbûreyi geri ahz u kabz eyledim deyü mevsûfe-i mezbûre Emine’nin ber-vech-i muharrer hürretü’l-asl olduğunu tâyi‘an ikrâr ve i‘tirâf etmeğin alâ mûceb-i i‘tirâfihî mevsûfe-i mezbûreden kasr-ı yedine mezbûr Ahmed Beşe’ye tenbîh ve mevsûfe-i mezbûrenin sebîli tahliye olunmağın mâ hüve’l-vâki‘ bi’t-taleb ketb olundu. Fi’l-yevmi’s-sâdis min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: Umdetü erbâbü’t-tahrîr ve’l-kalem tezkire-i evvel Yusuf Efendi, zübdetü ashâbi’t-tastîr ve’r-rakām tezkire-i sânî Hâfız Efendi, fahrü’l-eşbâh ve’l-a‘yân Mehmed Ağa ser-çavuşân, fahrü’l-akrân ve’l-ikfâ Muhzır Mehmed Ağa, Receb Efendi nâib-i kapan, Mustafa Efendi nâib-i recül, el-Hâc Halil Efendi, Hasan Beşe b. Şükrullah, Ahmed Bey b. Abdurrahman, Mehmed Ağa b. Mehmed, İbrahim Beşe b. Halil, Hasan Bey b. Ahmed sâkin-i Beykoz.