İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 476 Hüküm no: 365 Orijinal metin no: [115a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Avanos v. Asvador’un Mehmed Efendi Vakfı’na ait evdeki hissesine kardeşi Aksabete bt. Asvador’a sattığı Husûs-ı âti’l-beyânın mahâllinde ketb u tahrîri için savb-ı şer‘-i âlîden bi’l-iltimâs keşif nâibimiz fahrü’l-müderrisîn Abdullah Efendi b. Ali irsâl olunup ol dahi mahmiye-i İstanbul’da Kâtibkasım mahallesinde vâki‘ Şeyhü’l-harem-i merhûm es-Seyyid Mehmed Efendi nâm sahibü’l-hayrın vakfından zikri âtî menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mahalle-i mezbûre sükkânından Papa Avanos v. Asvador nâm zimmî vakf-ı mezbûrun bi’l-fi‘il mütevellîsi olan Hüseyin Çelebi b. Mehmed hazır olduğu hâlde meclis-i ma‘kūd-ı mezkûrda li-ebeveyn kız karındaşı olup zâtı zevci Avanos v. Vartan ve Haçador v. Aritun nâm zimmîler ta‘rîfleriyle mu‘arrefe olan bâ‘isetü hâze’l-vesîka Aksabete bt. Asvador nâm Nasrâniye muvâcehesinde bi-tav‘ihiikrâr ve takrîr-i kelâm edip işbu bir tarafdan merhûm Abdülbaki Efendi vakfı olan menzil ve bir tarafdan ba‘zen Seher bt. Asvador ve ba‘zen Tarakçı zevcesi Hursima bt. Asvador nâm Nasrâniyeler mülkleri ve bir tarafdan Kürkçü zevcesi Maryola bt. İstemat nâm Nasrâniye mülkü ve bir tarafdan tarîk-i âm ile mahdûd tabakāt-ı erba‘ayı muhtevî olup tabaka-i ulyâsında iki bâb oda ve bir sofa ve dehliz ve kenîf ve tabaka-i sâniyesinde iki bâb oda ve bir matbah ve iki sofa ve dehliz ve kenîf ve tabaka-i sâlisesinde üç bâb oda ve bir sofa ve dehliz ve kenîf ve tahtânî bir horasancı kârhânesi ve bir harâbe zîr-i zemîn ve sokak kapısını müştemil olup akd-i meclis-i şer‘ olunan menzile icâre-i mu‘accele-i ma‘lûme ve ayda yüz ellişer akçe ücret-i müeccele ile altı sehimden bir sehmine işbu hâzıra bi’l-meclis Huri bt. Avraham nâm Nasrâniye ve bir sehm-i şâyi‘asına kız karındaşım işbu mezbûre Aksabete ve dört sehmine mukaddemâ ben mutasarrıf olup menzil-i mezkûrdan vech-i mübeyyen üzere mutasarrıf olduğum dört sehim hisse-i şâyi‘amı târih-i kitâb senesi Saferü’l-hayrı’nın yirmi üçüncü günü üç yüz altmış guruş bedel mukābelesinde vakf-ı mezbûr mütevellîsi işbu hazır bi’l-meclis mezbûr Hüseyin Çelebi izni ve ma‘rifetleriyle kız karındaşım işbu mezbûre Aksabete’ye ferâğ ve tefvîz ve teslîm edip ol dahi ber-vech-i muharrer ba‘de’t-tefevvüz ve’l-kabûl ve’t-tesellüm ferâğımı hâmiş-i temessük ve atîka mütevellî-i mezbûra kayd ve imzâ ve hâtem etdirip temessük-i mezkûru mezbûreye def‘ ve teslîm etdiğimden sonra bedel-i ferâğ olan meblağ-ı mezbûr üç yüz altmış guruşu kız karındaşım mezbûre Aksabete yedinden tamamen ahz u kabz etmişidim menzil-i mezkûrun bir sehmi mukaddemâ dört sehmini târih-i mezkûrda benden tefevvüz etmekle ber-vech-i muharrer cem‘an beş sehm-i şâyi‘a kız karındaşım mezbûre Aksabete’nin dâhil-i havza-i tasarruf[u] olmuşdur benim kat‘an alâka ve medhalim kalmadı emsâli gibi mutasarrıfe olup dedikde gıbbe’t-tasâdiki’l-vicâhî vâki‘-i hâli mevlânâ-yı mezbûr mahâllinde ba‘de’t-tahrîr ma‘an irsâl olunan Mustafa Efendi b. Ömer ve Mehmed Çelebi b. İbrahim ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ve’l-ibtigā ketb ve imlâ olundu. Fi’l-yevmi’l-hâmis ve’l-ışrîn min-Zilka‘deti’ş-şerîfe li-sene seb‘a ve mie ve elf. Şuhûdü’l-hâl: Mehmed Efendi b. Hüseyin b. ( ) el-imâm, İbrahim Çelebi b. Abdullah, Ali Çelebi b. Abdullah, Hasan Çelebi b. Osman, Mehmed Çelebi b. İbrahim, Osman Çelebi b. Abdullah.