İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 477 Hüküm no: 366 Orijinal metin no: [115a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Huri bt. Avram’ın Mehmed Efendi Vakfı’na ait evdeki hissesine Avanos v. Parnak’a sattığı Husûs-ı âti’l-beyânın mahâllinde ketb u tahrîri için savb-ı şer‘-i münîrden bâ-fermân-ı âlî keşif nâibimiz fahrü’l-müderrisîni’l-kirâm Abdullah Efendi b. Ali irsâl olunup ol dahi hâssa mi‘mârlarından Üstâd Ali Halîfe b. Abdullah ve Osman Halîfe b. Abdullah ile mahmiye-i İstanbul’da Lanka/Langa kurbünde Kâtib Kasım mahallesinde Şeyhü’l-harem merhûm es-Seyyid Mehmed Efendi nâm sahibü’l-hayrın vakfından icâre-i mu‘accele-i ma‘lûme ve ayda yüz ellişer akçe ücret-i müeccele ile altı sehminden bir sehmi Huri bt. Avram ve beş sehmi Aksebete bt. Asvador nâm Nasrâniyelerin taht-ı tasarruflarında olup zikri âtî vakıf menzile varıp zeyl-i rakīmde muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûre Huri zâtını ma‘rifet-i şer‘iye ile ârifân zevci Papa Avanos v. Asvador ve diğer Avanos v. Parnak nâm zimmîler ta‘rîfleriyle mu‘arrefe oldukdan sonra vakf-ı mezbûrun bi’l-fi‘il mütevellîsi olan Hüseyin Çelebi b. Mehmed hazır olduğu hâlde meclis-i ma‘kūd-ı mezkûrda mezbûre Aksabete’nin zevci olan bâ‘is-i hâze’l-vesîka Avanos v. Vartan nâm zimmî muvâcehesinde bi’t-tav‘i’s-sâf ikrâr-ı tâm ve takrîr-i kelâm edip işbu bir tarafdan merhûm Abdülbaki Efendi vakfı olan menzil ve bir tarafdan ba‘zen Seher bt. Asvador ve ba‘zen Tarakçı zevcesi Hursima bt. Asvador nâm Nasrâniye mülkleri ve bir tarafdan Kürkçü zevcesi Maryola bt. İstemat nâm Nasrâniye mülkü ve bir tarafdan tarîk-i âm ile mahdûd olup tabakāt-ı erba‘ası muhtevî olup tabaka-i ulyâsında iki bâb oda ve bir sofa ve dehliz ve kenîf ve tabaka-i sâniyesinde [115b] iki bâb oda ve bir matbah ve iki sofa ve dehliz ve kenîf ve tabaka-i sâlisesinde üç bâb oda ve bir sofa ve dehliz ve kenîf ve tahtânî bir horasancı kârhânesini ve bir harâbe zîr-i zemîn ve havluyu ve sokak kapısını müştemil olup işbu akd-i meclis-i şer‘ olunan vakıf menzilin icâreteyn-i mezkûreteyn ile altı sehminden bir sehm-i şâyi‘i benim ve beş sehmi mezbûr Avanos’un zevcesi işbu hâzıra bi’l-meclis Aksabete bt. Asvador nâm Nasrâniyenin taht-ı tasarrufunda olup ve kābil-i kısmet olmağla mütevellî-i mezbûrun izniyle ber-vech-i muharrer mutasarrıfe olduğum bir sehm-i şâyi‘am tarîk-i muhâyâ-i şer‘iye vechi üzere işbu mezbûr Aksabete’nin mutasarrıfe olduğu hissesinden ifrâz ve ta‘yîn olunmak murâd eylediğimizde işbu mi‘mârân-ı mezbûrân menzil-i mezkûru cümle muvâcehelerinde mesâha ve tahmîn eyledikleri tarz-ı me’lûf üzere menzil-i mezkûrun binâsı arsası tûlen bi-hesâb-ı terbî‘i üç yüz elli dört zirâ‘ olup arsa-i mezkûrede elli dokuz zirâ‘ ber-vech-i meşrûh benim bir sehim hisseme isâbet eylediği ve ifrâz olunduğu takdîrce menzil-i mezkûrun vaz‘-ı kadîmî tağyîr ve gallesine noksan terettüb etmesi emr-i mukarrer olduğu mi‘mârân-ı mezbûrân ve sâir Müslimîn-i mezkûrînin ihbârlarıyla lede’ş-şer‘i’l-enver zâhir ve müte‘ayyin olmağın ben dahi bi’t-tav‘i’s-sâf menzil-i mezkûrdan vech-i mübeyyen üzere mutasarrıfe olduğum bir sehim hisse-i şâyi‘amı yüz otuz guruş bedel mukābelesinde vakf-ı mezbûr mütevellîsi olan işbu hazır bi’l-meclis mezbûr Hüseyin Çelebi izni ve ma‘rifetiyle mezbûre Aksabete’nin zevci işbu mezbûr Avanos’a ferâğ ve tefvîz ve teslîm edip ol dahi ber-vech-i muharrer ba‘de’t-tefevvüz ve’l-kabûl ve’t-tesellüm ferâğımı işbu atîk temessük kenarına mütevellî-i mezbûra kayd ve imzâ ve hâtem etdirip temessük-i mezkûru dahi merkūm Avanos’a def‘ ve teslîm etdiğimden sonra bedel-i ferâğ olan meblağ-ı mezbûr yüz otuz guruşu târih-i kitâbdan altmış bir gün tamamına değin tecîl edip ol dahi tecîl-i mezkûru kabûl ve ecel-i mezkûr hulûlünde bedel-i mezkûru tamamen bana edâ ve teslîme ta‘ahhüd eyledi. Fîmâ-ba‘d menzil-i mahdûd -ı mezkûrun ber-vech-i meşrûh altı sehimde bir sehm-i şâyi‘i mezbûr Avanos’un dâhil-i havza-i tasarrufu olmuşdur emsâli gibi mutasarrıf olsun dedikde gıbe’t-tasâdiki’l-vicâhî vâki‘-i hâli mevlânâ-yı mezbûr mahâllinde ba‘de’t-tahrîr ma‘an irsâl olunan Mustafa Efendi b. Ömer ve Mehmed Çelebi b. İbrahim ile meclis-i şer‘e gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ve’l-ibtigā ketb ve imlâ olundu. Fî 25 min-Zilka‘de sene [1]107. Şuhûdü’l-hâl: Mehmed Efendi b. Hüseyin el-imâm, İbrahim Çelebi b. Abdullah, Hasan Çelebi b. Osman, Mehmed Çelebi b. Abdullah, Ali Çelebi b. Abdullah.