İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 478 Hüküm no: 367 Orijinal metin no: [115b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Hezarfen Hüseyin Efendi’nin Sultan Murad Han Türbesi Vakfı’na ait evi takas yoluyla Mehmed Emin Efendi b. Mehmed Efendi’ye satışı Hilâl-ı sütûrda mastûr olan husûsun mahâllinde ketb u tahrîri için bi’l-iltimâs irsâl olunan Mevlânâ el-Hâc Ahmed Efendi b. Mustafa Dârü’l-hilâfeti’l-aliyye-i Kostantıniyyeti’l-mahmiyede Fethiye Câmi‘i kurbünde Kâtib Muslihiddin mahallesinde sâkin fahrü’l-müderrisîni’l-kirâm Mehmed Emin Efendi b. el-merhûm Mehmed Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i mübîn eyledikde zikrolunan câmi‘-i şerîf kurbünde sâkine olup zâtı ma‘rifet-i şer‘iye ile ârifân zevci Ali Ağa b. Murtaza ve es-Seyyid Abdülaziz Efendi b. es-Seyyid Mehmed Efendi el-imâm ta‘rîfleriyle mu‘arrefe olan Fâtıma Hatun bt. Hezarfen Hüseyin Efendi meclis-i ma‘kūd-ı merkūmda işbu kitâbın sahibi mûmâ-ileyh Mehmed Emin Efendi mahzarında ikrâr ve takrîr-i kelâm edip arsası merhûm Sultân Murad Han tâbe-serâhu Türbesi Vakfı’na senede yüz yirmi akçe mukāta‘a ile taht-ı tasarrufumda olup ebniyesi akd-i âti’z-zikrin sudûruna değin yedimde mülküm ve hakkım olan mârrü’z-zikr câmi‘-i şerîf kurbünde vâki‘ bir tarafdan ba‘zen Hamza Efendi bahçesi ve ba‘zen tarîk-i âm ve iki tarafdan mârrü’l-beyân Fethiye Câmi‘-i şerîfi haremi ve bir tarafdan câmi‘-i şerîf-i mezbûr haremi ve ba‘zen Ömer Efendi tasarrufunda olan vakıf menzil ile mahdûd dâhiliye ve hâriciyesinde büyût-ı adîde ve hamam ve mahzen ve tarîk-i âm ile tarîk-i hâss taraflarında taş duvarı müştemil menzilimin ebniye-i mezkûresini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafından îcâb ve kabûlü hâvî şürût-ı müfsideden ârî bey‘-ı bât-ı sahîh-i şer‘i ile bin iki yüz yaldız altınına mûmâ-ileyh Mehmed Emin Efendi’ye bey‘ ve temlîk ve teslîm ve arsasının hakk-ı tasarrufunu dahi mütevellî-i vakf-ı mezbûr ma‘rifetiyle mûmâ-ileyhe meccânen ferâğ ve tefvîz ol dahi iştirâ ve temellük ve tefevvüz ve kabûl ve tesellüm eyledikden sonra semeni olan meblağ-ı mezbûrun sekiz yüz seksen altınını bana nakd edâ ve teslîm ben dahi yedinden ahz u kabz edip ve üç yüz yirmi altınını dahi ebniyesi yedlerinde mülk ve hakları olup bana bey‘ ve teslîm ben dahi iştirâ ve kabz eyledim mârrü’z-zikr Kâtib Muslihiddin mahallesinde vâki‘ ma‘lûmü’l-hudûd ve’l-müştemilât menzil semeninden kendilere deynim olan üç yüz yirmi yaldız altınına takās ol dahi mukāssa ve kabûl eyledim. Min-ba‘d menzil-i mahdûd-ı mezkûrun ebniyesi mûmâ-ileyh Mehmed Efendi’nin mülk-i müşterâsı ve ve arsası hakk-ı müfevvazı olup benim kat‘an alâka ve medhalim kalmamışdır keyfe mâ yeşâ [116a] ve hasbemâ yehtâr mutasarrıf olsunlar dediklerinde gıbbe’t-tasdîkı’ş-şer‘î husûs-ı mezkûru mevlânâ-yı mezbûr mahâllinde tahrîr ma‘an irsâl olunan Mehmed b. Ali ve Mustafa b. Şaban ile meclis-i şer‘e gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene seb‘a ve mie ve elf. Şuhûdü’l-hâl: Umdetü’l-müderrisîni’l-kirâm Osman Efendi, Fahrü’l-müderrisîni’l-kirâm Hâdîzâde Feyzullah Efendi, Mehmed Efendi imâm-ı mahalle-i Derviş Ali, Mehmed Efendi b. b. Yakub, Mustafa Ağa b. Ahmed, Mustafa Efendi b. Mehmed, İbrahim Efendi b. Halil, Mahmud Çelebi b. Mehmed bezzâstânî, Mehmed Efendi b. Mahmud, Hasan b. Hüseyin, Mehmed Efendi b. Habib el-müderris, es-Seyyid Mustafa Efendi b. Abdülkerim Ankaravî, Vefalı Mahmud Çavuş b. Sefer, Ahmed b. Süleyman.