İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 480 Hüküm no: 368 Orijinal metin no: [116a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin Efendi b. Mehmed Efendi’nin Yemen fatihi merhûm Gazi Sinan Paşa Vakfı’na ait evi takas yoluyla Fâtıma Hatun bt. Hezarfen Hüseyin Efendi’ye satması Husûs-ı âti’l-beyânın mahâllinde tahrîri için bi’l-iltimâs savb-ı şer‘-i enverden irsâl olunan Mevlânâ el-Hâc Ahmed Efendi b. Mustafa mahmiye-i İstanbul’da Fethiye Câmi‘i-i şerîfi kurbünde Kâtib Muslihiddin mahallesinde sâkin fahrü’l-müderrisîni’l-kirâm Mehmed Emin Efendi b. el-merhûm Mehmed Efendi’nin menziline varıp zeyl-i vesîkada muharrerü’l-esâmî olan Müslimîn huzûrunda akd-i meclis-i şer‘-i mübîn eyledikde mûmâ-ileyh Mehmed Emin Efendi meclis-i ma‘kūd-ı merkūmda işbu sâhifetü’l-kitâb Fâtıma Hatun bt. Hezarfen Hüseyin Efendi mahzarında ikrâr ve takrîr-i kelâm edip arsası fâtih-i Yemen merhûm Gāzi Sinan Paşa Vakfı’na senede yüz akçe mukāta‘a ile taht-ı tasarrufumda olup ebniye akd-i âtî sudûruna değin yedimde mülküm olan mahalle-i mezbûrede vâki‘ iki tarafdan tarîk-i âm ve bir tarafdan Fethiye Câmi‘i-i şerîfi haremi ve bir tarafdan merhûm Vefalı Mehmed Efendi Vakfı olan odalar ile mahdûd dâhiliye ve hâriciyesinde büyût-ı adîde ve bi’r-i mâ ve eşcâr-ı müsmire ve gayr-ı müsmire ve tarîk-i âm taraflarında taş duvarı müştemil menzilimin ebniye-i mezkûresini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bât-ı sahîh-i şer‘i ile üç yüz yirmi yaldız altınına mezbûre Fâtıma Hatun’a bey‘ ve teslîm ve arsasının hakk-ı tasarrufunu dahi vakf-ı mezbûr mütevellîsi ma‘rifetiyle mezbûre Fâtıma Hatun’a meccânen ferâğ ve tefvîz ol dahi ber-vech-i muharrer iştirâ ve tesellüm ve tefevvüz ve kabûl eyledikden sonra semeni olan meblağ-ı mezbûr üç yüz yirmi altını yedinden iştirâ ve kabz eylediğim menzil semeninden kendiye deynim olan üç yirmi yaldız altınını takās ben dahi mukāssa ve kabûl eyledim min-ba‘d menzil-i mahdûd-ı mezbûrun ebniyesi mezbûre Fâtıma Hatun’un mülk-i müşterâsı ve arsası hakk-ı müfevvazı olmuşdur. Keyfe mâ teşâ’ ve tahtâr mutasarrıfe olsun dedikde gıbbe’t-tasdîkı’ş-şer‘î husûs-ı mezkûru mevlânâ-yı mezbûr mahâllinde tahrîr ve ma‘an irsâl olunan Mehmed b. Ali ve Mustafa b. Şaban ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’r-râbi‘ aşer min-Zilhicceti’ş-şerîfe li-sene seb‘a ve mie ve elf. Eş-Şâhidûne’s-sâbıkūn.