İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 481 Hüküm no: 369 Orijinal metin no: [116a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun Vakfı’nın eski mütevellisi Mehmed Efendi b. Sefer b. Abdullah’ın üzerinde olan vakıf parasının vereseler tarafından mütevelli Hasan Ağa b. Maden’e ödendiği Mahmiye-i İstanbul’da merhûm Hatice Hatun Vakfı’na bi’l-fi‘il mütevellî olan el-Hâc Hasan Ağa b. Maden nâm kimesne meclis-i şer‘-i şerîf-i enverde vakf-ı mezbûra mukaddemâ mütevellî iken fevt [olan] Mehmed Efendi b. Sefer b. Abdullah nâm kimesnenin verâseti zevce-i metrûkesi Hanife Hatun bt. Mehmed ile sulbiye kebîre kızları Fâtıma Hatun ve Emetullah Hatun’a münhasıra olduğu şer‘an zâhir ve müte‘ayyin oldukdan sonra mezbûrtân Hanife Hatun ve Fâtıma Hatun taraflarında husûs-ı âti’z-zikre vekîl-i müsecceli olan el-Hâc Ahmed b. Abdullatif ve merkūme Emetullah Hatun’un zevci ve tarafından kezâlik husûs-ı câ’i’z-zikre vekîl-i müsecceli olan mezbûr el-Hâc Ahmed’in oğlu İbrahim Çelebi mahzarlarında bi’t-tevliye ikrâr-ı tâm ve takrîr-i kelâm edip mezbûr Mehmed Efendi vakf-ı mezbûra ber-vech-i muharrer mütevellî iken fevt olmağla ber-mûceb-i defter-i muhâsebe vakf-ı mezbûrun asl-ı mâlı olan beş yüz guruşun seksen guruşu Kâtib Mustafa zimmetinde ve on guruşu Cerrâh Mehmed Çelebi zimmetinde ve on üç guruşu Hammâmî Siyavuş Bey zimmetinde ve yirmi beş guruşu Kapıcı Mehmed zevcesi zimmetinde ve on sekiz guruşu Muslu Bey zimmetinde ki cem‘an asl-ı mal-ı mezbûrun yüz kırk altı guruşunu merkūm Mehmed Efendi hâl-i hayatında mezkûrûna bi’t-tevliye edâ ve teslîm etmekle elân zimem-i mezkûrînden olup mâ‘adâsı olan üç yüz elli dört guruşu nakd yedinde der-kîse ve mevcûd iken mübeyyenen fevt olmağla verese-i mezbûrân Hanife Hatun ve Fâtıma Hatun ve Emetullah Hatun ben müteveffât-i mezbûrun yerine vakf-ı merkūma mütevellî olduğuma binâen meblağ-ı mezbûr yüz kırk altı guruş ile beni cümlemiz <>meclisde [116b] iken erbâb-ı zimem-i mezkûrîn üzerlerine havâle-i sahîha-i şer‘iye ile havâle ve rihân-ı makbûzalarını bi-aynihâ bana teslîm ben dahi bi’t-tevliye havâle-i mezbûreyi kabûl ve rihân-ı merkūmeyi be‘de’l-kabz mâ‘adâsı olup yedinden der-kîse ve mevcûd olan meblağ-ı mezbûr üç yüz elli dört guruşa işbu meclisde bana teslîm ben dahi bi’t-tevliye ahz u kabz eyledim. Fîmâ-ba‘d asl-ı mal-ı vakf-ı mezbûr ile nemâsından verese-i mezbûrât yedlerinde ve zimmetlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî evâhiri Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Mehmed Efendi b. Hasan el-imâm, Mehmed Çelebi b. Davud, Abdullah Çelebi b. Mehmed, Süleyman Bey b. Nasuh, Ali Çelebi b. Abdullah, el-Hâc İbrahim b. ( ), el-Hâc Hamza Ağa b. ( ), Abdurrahman Efendi halîfe-i muhâsebe, Mehmed Efendi halîfe-i muhâsebe, Salih Efendi b. ( ).