İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 482 Hüküm no: 370 Orijinal metin no: [116b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nalinci Mahmud Vakfı’nın eski mütevellisi Mehmed Efendi b. Sefer b. Abdullah’ın üzerinde olan vakıf parasının vereseler tarafından mütevelli Hasan Ağa b. Maden’e ödendiği Mahmiye-i İstanbul’da merhûm Na‘linci Mahmud Vakfı’na hâlâ mütevellî olan Hasan Ağa b. Maden nâm kimesne meclis-i şer‘-i şerîfde vakf-ı mezbûra kendiden mukaddem mütevellî iken fevt olan Mehmed Efendi b. Sefer b. Abdullah nâm kimesnenin verâsetine zevce-i metrûkesi Hanife Hatun bt. Mehmed ile sulbiye kebîre kızları Fâtıma Hatun ve Emetullah Hatun’a münhasıra olduğu şer‘an zâhir ve müte‘ayyen oldukdan sonra mezbûretân Hanife Hatun ve Fâtıma Hatun taraflarında husûs-ı âti’z-zikre değin vekîl-i müsecceli olan el-Hâc Ahmed b. Abdullatif ve merkūme Emetullah Hatun’un zevci ve tarafından kezâlik husûs-ı câ’i’z-zikre vekîl-i müsecceli olan mezbûr el-Hâc Ahmed’in oğlu İbrahim Çelebi mahzarlarında bi’t-tevliye ikrâr-ı tâm ve takrîr-i kelâm edip mezbûr Mehmed Efendi ber-vech-i muharrer vakf-ı mezbûra mütevellî iken nemâ ve galleden hâsıl olup asl-ı mal-ı vakf-ı mezbûr olmak üzere bin üç yüz kırk guruş cem‘ olup meblağ-ı mezbûru mezkûr Mehmed Efendi zaman-ı tevliyetinde ahz u kabz eyledikden sonra mürtezika-i vakfın ihbârları üzere meblağ-ı mezbûrun yüz elli beş guruşuna yine zaman-ı tevliyetinde mürtezika-i vakfın <> vazîfelerine teslîm edip bin yüz yetmiş beş guruşu bâkī kalmağla meblağ-ı mezbûrun yirmi beş guruşunu Nişancıpaşa imâmı Mehmed Efendi’ye ve on guruşunu mezbûr Mehmed’in vâlidesine ve on bir buçuk guruşunu Sandalcı eş-Şeyh Mehmed Efendi’ye ki cem‘an kırk altı buçuk guruşunu merbûh olmak üzere zimem-i mezkûrîne edâ ve teslîm edip ve kırk dört guruşu Yusuf Bey zimmetinde ve on guruşu Saray-ı atîk teberdârı Hasan Bey zimmetinde ve elli guruşu Avadik zimmetinde ve yirmi guruşu Vartan nâm zimmî zimmetinde ve on sekiz guruşu Hursima nâm Nasrâniye zimmetinde <> ve on sekiz guruşu Mardiros zimmetinde ve yüz on buçuk guruşu Ahmed Efendi zimmetinde ki cem‘an iki yüz yetmiş buçuk guruşu gayr-ı merbûh mütevellî-i sâbık zakmânında zimem olup mâ‘adâsı olan sekiz yüz elli sekiz guruşu nakd yedinden der-kîse ve mevcûd iken mezbûr Mehmed Efendi ber-vech-i muharrer mübeyyenen fevt olup yerine ben mütevellî olduğumda verese-i mezbûrât ber-mûceb-i defter-i muhâsebe mal-ı mezbûrdan merbûh ve gayr-ı merbûh zimem-i mezkûrînden olan cem‘an üç yüz on yedi guruş ile beni cümlemiz meclisde iken erbâb-ı zimem-i mezkûrîn üzerlerine havâle-i sahîha-i şer‘iye ile havâle ve rihân-ı makbûzalarını bana def‘ ve teslîm ben dahi bi’t-tevliye havâle-i mezkûreyi kabûl ve rihân-ı merkūmeyi ba‘de’l-kabz yedinden der-kîse ve mevcûd olan meblağ-ı mezbûr sekiz yüz elli sekiz guruşu işbu meclisde bana def‘ ve teslîm ben dahi bi’t-tevliyet yedlerinden ahz u kabz ve teslîm eyledim. Fîmâ-ba‘d asl-ı mâl ve nemâdan verese-i mezbûrât Hanife Hatun ve Fâtıma Hatun ve Emetullah Hatun yedlerinde ve zimmetlerinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî evâhiri Şa‘bân-ı mu‘azzam li-sene seb‘a ve mie ve elf. Şuhûdü’l-hâl: eş-Şâhidûne’s-sâbıkūn.