İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 489 Hüküm no: 374 Orijinal metin no: [118b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangın sonucu yanan Revanî Çelebi Camii’nin tekrar inşası için yapılacak masrafları muhtevi keşif Husûs-ı âti’z-zikrin mahâllinde ketb u tahrîri bâbında fermân-ı âlî vârid olmağın imtisâlen-leh savb-ı şer‘-i mutahhardan keşif nâibimiz olan Abdullah Efendi b. Ali irsâl olunup ol dahi hâssa mi‘mârlardan Mehmed Halîfe b. Mustafa ve Mustafa Halîfe b. Abdullah ile mahmiye-i İstanbul’da Kırkçeşme kurbünde Mollahüsrev mahallesinde vâki‘ merhûm Revânî Çelebi Câmi‘-i şerîfine varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i Nebevî eylediğinde câmi‘-i şerîf-i mezbûr evkāfına bi’l-fi‘il mütevellî olan işbu bâ‘isü’l-kitâb Hüseyin Ağa b. Musa nâm kimesne meclis-i ma‘kūd-ı mezbûrda takrîr-i kelâm ve bast-ı merâm edip mütevellîsi olduğum işbu câmi‘-i şerîf-i mezbûrun ebniyesi bin yüz beş senesinde vâki‘ harîkde bi’l-külliye muhterik olup ancak cidarân-ı erba‘ası bâkī kalmışidi mezrûfum olan meblağı vakfa rücû‘ etmek üzere izn-i hâkimü’ş-şer‘le câmi‘-i şerîf-i mezbûru işbu tarz-ı müşâhed üzere binâ etmişidim hâlâ kıbel-i şer‘den keşif ve masrûfum tahmîn-i sahîh ile tahmîn ve takvîm olunup hüccet olunmak matlûbumdur dedikde mi‘mârân-ı mezbûrân câmi‘-i şerîf-i mezbûrun ebniye-i cedîdesini bi’l-muvâcehe mesâha eylediklerinde tûlen ve arzen bi-hesâb-ı terbî‘i dört yüz yirmi altı zirâ‘ sakf[ın] zirâ‘ı elli beş akçeden yirmi üç bin dört yüz otuz akçe ve hesâb-ı mezbûr iki yüz üç zirâ‘ devr şişeli ve sülügen boyalı çam tahtası tavan zirâ‘ı ellişer akçeden on bin yüz elli akçe ve mahfilde vâki‘ bi-hesâb-ı mezbûr yirmi iki zirâ‘ çam tahtası tavan zirâ‘ı kırk akçeden sekiz yüz seksen akçe ve yine mahfil-i mezbûrda vâki‘ bi-hesâb-ı mezbûr yirmi iki zirâ‘ ağa tahtası döşeme zirâ‘ı yirmi beş akçeden beş yüz elli akçe tûlen on ve kadden bir zirâ‘ sülügen Tarabuzan üç yüz akçe ve on ayak basamaklı bir mahfil nerdübân üç yüz akçe ve kadden on iki zirâ‘ ve kalınlığı sekiz parmak üç aded vurdina direği ve herbiri yedişer yüz akçeden iki bin yüz akçe ve bir İnebolu tabanı yüz akçe ve Arabî kanadlı sekiz aded pencerenin herbiri üçer yüz akçeden iki bin dört yüz akçe ve direkden beçeme sekiz aded sâde çerçeve ma‘a meremmât-ı demir bin akçe ve Arabî kanadlı iki aded sandık ve dolab yedi yüz yirmi akçe ve altı aded billûr cam duvar ve altı aded bâdemî cam astar herbiri yüz seksener akçeden iki bin yüz altmış akçe ve mahfilde vâki‘ çam tahtası kanadlı bir sagīr pencere ma‘a köprüleme ve tavan iki yüz akçe ve bi-hesâb-ı mezbûr dört zirâ‘ küfeli taş kapı söğeleri bin iki yüz akçe ve bi-hesâb-ı mezbûr yedi yüz elli altı zirâ‘ kara suva yerine kireç ma‘a horasan ve yüzü beyâz suva zirâ‘ı on ikişer akçeden dokuz bin yetmiş akçe ve kadden üç ve arzen bir buçuk zirâ‘ mükemmel Arabî câmi‘ kapısı ma‘a kebîr kilid altı yüz akçe ve duvar içinde vâki‘ çifte İnebolu tabanından iki yüz yirmi zirâ‘ hatıl zirâ‘ı yirmişer akçeden dört bin dört yüz akçe ve kapı üzerinde vâki‘ çam tahtası tavan ma‘a köprüleme üç yüz akçe ve minâre kapısı çerçevesi ma‘a köprüleme iki yüz akçe ve tavanda merküz yirmi aded halka herbiri on ikişer akçeden iki yüz kırk akçe ve sekiz aded pencerenin üzerleri kârgir rıhtım ve Samsun direğinden köprüleme bin dört yüz akçe ve taşra terzileri iki yüz akçe ve mihrâb kitâbesi ve nakşı Frenk-pesend zincir ve kapı üzerinde tâc nakşa beş yüz akçe ve sofada vâki‘ kadden on iki zirâ‘ ve kalınlığı sekiz parmak beş aded vurdina direği herbiri biri yedişer yüz akçeden üç bin beş yüz akçe ve Samsun direğinden sekiz aded destek ma‘a taban üç yüz akçe ve bi-hesâb-ı merkūm elli zirâ‘ Milan tahtasından boyalı parmaklık zirâ‘ı otuz akçeden bin beş yüz akçe ve çam tahtasından bir orta kapı ma‘a kilid dört yüz akçe ve sokak kapısı üzerinde vâki‘ nîm şişeli ve sülügen boyalı altı zirâ‘ çam tahtası tavan iki yüz kırk akçe ve yine kapı-yı mezbûr üzerinde vâki‘ bi-hesâb-ı mezbûr dokuz zirâ‘ sakf zirâ‘ı otuzar akçeden yüz yirmi akçe ve çınar tahtasından bir mükemmel [119a] sokak kapısı ma‘a kilid beş yüz akçe ve kapı-yı mezbûr üzerinden vâki‘ altı aded köprüleme yama direği yirmişer akçeden yüz yirmi akçe ve câmi‘-i şerîf-i mezbûrun iki tarafında vâki‘ bi-hesâb-ı mezbûr kırk iki zirâ‘ ağa tahtası perde zirâ‘ı yirmişer akçeden sekiz yüz kırk akçe ve taşı mevcûd ve altı zirâ‘ taş duvar zirâ‘ı otuz akçeden yüz seksen akçe ve def‘a sekiz zirâ‘ taş duvar zirâ‘ı kezâlik otuzar akçeden iki yüz kırk akçe ve bi-hesâb-ı mezbûr kezâlik taşı mevcûd kırk iki zirâ‘ bahçe duvarı zirâ‘ı otuzar akçeden bin iki yüz altmış akçe ve makābir etrâfında vâki‘ sed duvarı meremmâtı yüz seksen akçe ve çerçevesi topaç direk üzerinde dokuzar zirâ‘ sakf çınar tahtasından bir mükemmel mahalle kapısı bin akçe ve bi-hesâb-ı mezbûr on beş zirâ‘ taşı mevcûd kenîf duvarı zirâ‘ı otuz akçeden dört yüz elli akçe ve kenîf-i mezbûrda bi-hesâb-ı sâlif[ü’z-zikr] otuz zirâ‘ tahta perde zirâ‘ı yirmişer akçeden altı yüz akçe ve dört zirâ‘ tahta kenîf ve döşemesi seksen akçe ve kenîf-i mezbûr üzerinde vâki‘ bi-hesâb-ı merkūm on üç zirâ‘ sakf zirâ‘ı otuz akçeden üç yüz doksan akçe ve bi-hesâb-ı mezbûr seksen zirâ‘ minâre külâhı ma‘a seren ve iskele harcı iki bin dört yüz akçe ve bir minâre alemi ma‘a tası dört yüz yirmi akçe ve atîk kurşun ve üstâdiyyesi dört yüz beş akçe ve seksen yedi buçuk vakıyye cedîd kurşun beher vakıyyesi yirmi dörder akçeden iki bin yüz akçe <> ve kâriz meremmâtı bin beş yüz akçe ve ihrâc-ı mezbele bin akçe ve ücret-i mu‘temed ve kâtib ve ta‘âmiye dört bin akçe ve atîk mismâr meremmâtı iki yüz akçe ki min-haysü’l-mecmû‘ seksen altı bin beş yüz doksan beş akçe ile ancak olur noksanı ile olmak mümkün değildir deyü mi‘mârân-ı mezbûrân ve Müslimûn-ı mezbûrun icmâ‘ ve ittifâk etmeğin vâki‘-i hâli mevlânâ-yı mezbûr ve mahâllinde tahrîr ve ma‘an irsâl olunan Mehmed Çelebi b. İbrahim ve Yusuf b. Mehmed ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’t-tâsi‘ min-Şevvali’l-mükerrem li-sene seb‘a ve mie ve elf. Şuhûdü’l-hâl: es-Şeyh Ahmed Efendi b. Hamza el-vâiz, Süleyman Efendi b. Hızır el-hatîb, Ahmed Ağa b. Musa, el-Hâc Ahmed b. Hasan, Ali Çelebi b. İbrahim el-müezzin, İbrahim Çelebi b. İslâm, Mustafa Çelebi b. Şaban, İbrahim Çelebi b. Mehmed, el-Hâc Ahmed b. Mustafa, Mahmud Çelebi b. İsmail, Mehmed Çelebi b. Rıdvan, Abdullah Efendi b. Mustafa, Ali Efendi b. Mustafa, Osman Çelebi b. Abdullah.