İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 491 Hüküm no: 375 Orijinal metin no: [119a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet/Karabit v. Mıgırdıç’ın Süleyman Ağa b. Hüseyin b. Sinan’a olan borcunu kabul ettiği El-emrü kemâ zükire fîhi nemekahü’l-abdü’l-fakiru ileyh sübhânehû ve te‘âlâ. Abdullah el-müvellâ hilâfetuhû bi-mahkeme-i Ahî Çelebi bi-medîneti Kostantıniyye el-mahrûse ufiye anhü. Mahmiye-i İstanbul’da Baba Hasan mahallesinde sâkin Süleyman Ağa b. Hüseyin b. Sinan nâm kimesne tarafından husûs-ı âti’l-beyâna vekîl olup Osman Çelebi b. Ali ve İbrahim Çelebi b. el-Hâc Mehmed nâm kimesneler şehâdetleriyle şer‘an vekâleti sâbit olan bâ‘is-i hâze’l-kitâb Abdullah Çelebi b. Mehmed nâm kimesne meclis-i şer‘-i hatîr-i lâzımü’t-tevkīrde ekmekçi tâifesinden Karabet v. Mıgırdıç nâm zimmî muvâcehesinde bi’l-vekâle üzerine da‘vâ ve takrîr-i kelâm edip müvekkilim mezbûr Süleyman Ağa’nın merkūm Karabit zimmetinde yedinde müşterâ ve makbûz mâ‘lûmü’l-keyl buğday semeninden ba‘de külli’l-hesâb otuz üç esedî guruş hakkı olmağla hâlâ meblağ-ı mezbûru bi’l-vekâle taleb ederim mezbûra suâl olunup meblağ-ı mezkûrun alıverilmesi murâdımdır dedikde gıbbe’s-suâl merkūm Karabit cevâbında fi’l-vâki‘ kazıyye vekîl-i mezbûrun ber-vech-i muharrer takrîr-i meşrûhu üzere olup müvekkil-i mezbûr Süleyman Ağa’ya meblağ-ı mezkûr otuz üç esedî guruş el-ân zimmetimde vâcibü’l-edâ ve lâzımü’l-kazâ deyni olduğunu bi’t-tav‘i’s-sâf ikrâr ve i‘tirâf etmeğin alâ mûceb-i ikrârihî meblağ-ı mezkûru müdde‘î-i mezbûra edâ ve teslîm etmek üzere merkūm Karabit’e tenbîh-birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-ışrîn min-Şa‘bâni’l-mu‘azzam li-sene seb‘a ve mie ve elf. Şuhûdü’l-hâl: Receb Çelebi b. Osman, Hüseyin b. Hasan, Ömer Çelebi Veli, Bekir Sâlim Çelebi b. Hüseyin.