İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 492 Hüküm no: 376 Orijinal metin no: [119a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahpus olan Karabet v. Mıgırdıç’ın, borcunun bir kısmını alacaklısının vekili olan Abdullah Çelebi b. Mehmed’e ödediği İşbu sene-i mübârekede es-sadakatü terüddü’l-belâ ve tezyîdü’l-ömr mazmûnuyla amel buyurulup ihrâz-ı rızâ-yı melik-i gaffâr ve isticlâb ed‘iyye-i hayriye-i ashâb-ı ıztırâr için tesâdduk buyurulmağla sicn-i sultânîde düyûn-ı müsbite için mahbûs olan fukarâ ve zu‘afânın garîbleri kendi yedlerinde olan hüccet-i şer‘iye mûcebince haklarının birer mikdârı taraf-ı mîrîden tesâdduk ve ihsân olunan meblağdan ahz ve bâkī haklarında medyûnlarının zimmetlerini ibrâ etmeleriyle husûs-ı âti’z-zikri [119b] mahâllinde ketb u tahrîri için bâ-fermân-ı âlî kıbel-i şer‘den irsâl olunan Ebûbekir Efendi mahmiye-i İstanbul’da vâki‘ Baba Cafer Zindânı’na varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde derûn-ı hüccette mastûrü’l-isim olan vekîl-i mezbûr Abdullah Çelebi b. Mehmed meclis-i ma‘kūd-ı mezbûrda medyûn-ı merkūm Karabet v. Mıgırdıç nâm zimmî muvâcehesinde bi’l-vekâle ikrâr ve takrîr-i kelâm edip işbu derûn-ı hüccette mastûr olan deyn-i mezbûr otuz üç guruşun on bir guruşunu vech-i meşrûh üzere tesâdduk ve ihsân olunan meblağdan bi’l-vekâle ahz u kabz edip mâ‘adâsı olan yirmi iki guruş da‘vâsından medyûn-ı mezbûr Karabet’in zimmetini ibrâ-i âmm-ı kātı‘u’n-nizâ‘la bi’l-vekâle ibrâ ve ıskāt eyledim eğer müvekkil-i mezbûr ziyâde-i merkūmeyi mezbûr Karabet’den taleb ve ahz ederse ben kendi mâlımdan zâmin ve kefîl oldum dedikde gıbbe’t-tasdîkı’ş-şer‘î vâki‘-i hâli mezbûr Ebûbekir Efendi mahâllinde tahrîr edip ba‘dehû ma‘an ba‘s olunan Ali b. Bali ve Mehmed b. Receb ile meclis-i şer‘e gelip alâ vukū‘ihî inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî aşer min-şehri Ramazani’l-mübârek li-sene seb‘a ve mie ve elf. Şuhûdü’l-hâl: Ebûbekir Ağa el-mübâşir, Veznedâr Ali Çelebi, es-Seyyid Şükrullah Efendi, es-Seyyid Hasan Efendi, es-Seyyid Ali Efendi.