İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 493 Hüküm no: 377 Orijinal metin no: [119b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey b. Receb’in alacak davasından Ahmed Ağa b. Mehmed ve karısı Belgradlı Hacer bt. İbrahim ile sulh olduğu Fi’l-asl vilâyet-i Rumeli’nde Niğbolu kasabasında Şabanefendi mahallesi ahâlîsinden olup hâlâ mahmiye-i İstanbul’da Bahçekapısı kurbünde sâkin Hasan Bey b. Receb nâm kimesne meclis-i şer‘-i şerîf-i enverde mahmiye-i mezbûrda Eminbey mahallesinde sâkine işbu râfi‘atü’l-kitâb Belgradlı Hacer bt. İbrahim nâm Hâtûn mahzarında ikrâr-ı tâm ve takrîr-i kelâm edip târih-i kitâbdan bir buçuk sene mukaddem mezbûre Hacer’in zevci gāib ani’l-meclis Ahmed Ağa b. Mehmed’e medîne-i Edirne’de yedimde mülküm olan bir mukaffel ve memhûr sepet sandığı içinde mevcûd iki yüz yaldız altını ve yirmi beş guruşluk para ve üç sîm raht ma‘a topuz ve üç sîm kılıç ve üç sîm gaddâre ve iki nâfe kürk ve sofa kablı iki sincab kürk ve sakız dimiye kablı bir nimten kürk ve yedi cedîd hünkârî sarık ve iki kavuk ve üç çift çizme ve iki çakşır ve üç sof kerrâke ve üç çekme boyama ve bir Şâmî kesme ve üç hilâlî ve üç kutnî ve iki muhattem kuşak ve iki taraklı entâri ve bir Hindî alacası ve iki beyâz sâdemi bi-tarîkı’l-emâne vaz‘ ve teslîm ol dahi ahz u kabz eyledikden sonra târih-i kitâb senesi Cumâdeluhrası’nın yedinci günü medîne-i Silistre kadısı olan Şeyhî Mehmed Efendi b. eş-Şeyh Ali huzûrunda mezbûr Ahmed Ağa’dan taleb ve da‘vâ eylediğimde ol dahi bi’l-külliye inkâr etmekle ben dahi müdde‘âmı Çartan kazâsına tâbi‘ Suvarnık nâm karyeden Ahmed b. Hüseyin ve Sağırlar nâm karyeden Mehmed b. Satılmış şehâdetleriyle mezbûr Ahmed Ağa muvâcehesinde şer‘an isbât edip bana red ve teslîmine hükm-i hâkimü’ş-şer‘î lâhık oldukdan sonra zevcesi mezbûre Hacer Hatun meblağ-ı mezbûr ile eşyâ-i mezkûreye kefâlet-i sahîha-i şer‘iye ile kefîl olmuşidi deyü mezbûre Hacer Hatun’dan taleb ve da‘vâ etmişidim el-hâletü hâzihî meblağ-ı mezbûre ve eşyâ-i mezkûreye ve târih-i kitâba gelince beynimizde cereyân eden sâir ahz ve i‘tâ ve mu‘amelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan mezbûr Ahmed Ağa ve Hacer Hatun’un zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledim. Min-ba‘d târih-i kitâba gelince mezbûrân Ahmed Ağa ve Hacer Hatun ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ vaka‘a bi’t-taleb ketb olundu. Fî gurreti Zilhicceti’ş-şerîfe li-sene seb‘a ve mie ve elf. Şuhûdü’l-hâl: Ömer Efendi b. el-Hâc Ali, Mustafa Çelebi b. Mehmed, el-Hâc Ali b. Hüseyin, Mustafa Çelebi b. Osman, el-Hâc Veli b. Mustafa, Ahmed Efendi el-imâm, Mustafa Efendi imâm-ı Cihangir, Mehmed Çavuş el-mübâşir, İbrahim Çelebi b. Ahmed.