İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 496 Hüküm no: 380 Orijinal metin no: [120b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmet Çelebi kendisine emanet edilen gülâbdân ve tepsiyi kız kardeşi Ayşe’ye teslim ettiğinden Mustafa’nın davadan men edilmesi Mahrûse-i Galata muzâfâtından kasaba-i Beşiktaş’da Abbas Ağa mahallesinde sâkin Mustafa b. Mehmed meclis-i şer‘-i şerîf-i enverde el-Hâc Ahmed Çelebi b. Abdurrahman mahzarında üzerine da‘vâ ve takrîr-i kelâm edip târih-i kitâbdan on sene mukaddem üç yüz yirmi dirhem bir sîm gülâbdân ve bir sîm tepsimi mezbûr el-Hâc Ahmed Çelebi’ye âhara bey‘ edivermek için def‘ u teslîm ol dahi ber-vech-i muharrer ahz u kabz etmekle suâl olunup mevcûd ise aynlarını müstehlek ise ba‘de’s-sübût kıymet-i şer‘iyyelerini bana teslîme tenbîh olunmak matlûbumdur dedikde gıbbe’s-suâl mezbûr el-Hâc Ahmed Çelebi cevâbında târih-i mezbûrda mezbûr Mustafa zikrolunan üç yüz yirmi dirhem gülâbdân ve sîm tepsi kız karındaşım Âişe bt. el-Hâc Kasım nâm hatunun mülküdür benim alakam olmayıp yedimde emânet olmağla tarafımdan var mezbûre Ayşe’ye teslîm eyle deyü yedime def‘ u teslîm ben dahi ber-vech-i muharrer ahz u kabz etdiğimden sonra mârrü’z-zikr gülâbdân ve tepsiyi emr-i mezkûrûna binâen karındaşım mezbûre Âişe Hatun’a teslîm eyledim deyücek gıbbe’l-istintâk ve’l-inkâr mezbûr el-Hâc Ahmed Çelebi’den ber-vech-i muharrer def‘-i mezbûrunu mübeyyene beyyine taleb olundukda udûl-i ahrâr-ı ricâl-i Müslimînden olup Üskübî mahallesinde sâkin Emrullah Çelebi b. Mehmed ve Âşık Paşa mahallesinde sâkin İsmail b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Mustafa târih-i mezkûrda zikrolunan üç yüz yirmi dirhem bir sîm gülâbdân ve bir sîm tepsi karındaşım mezbûre Ayşe’nin mülküdür benim alakam olmayıp yedimde emânet olmağla tarafımdan var mezbûre Ayşe[ye] teslîm eyle deyü mezbûr el-Hâc Ahmed Çelebi’ye emr ve bizim huzûrumuzda mârrü’z-zikr gülâbdân ve tepsiyi yedine teslîm ol dahi ber-vech-i muharrer ahz u kabz ve yine huzûrumuzda mezbûre Ayşe’ye teslîm etmişidi biz bu husûsa bu vech üzere şahidleriz şehâdet dahi ederiz deyü her biri edâ-i şehâdet-i şer‘iyye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mezbûr Mustafa bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis ve’l-ışrîn min-Zilka‘deti’ş-şerîfe li-sene seb‘a ve miete ve elf. Şuhûdü’l-hâl; İbrahim Çelebi b. Ahmed, Ali Çelebi b. Bali, Mehmed Çelebi b. İdris, Receb b. Süleyman, Ahmed b. Ahmed, Ali b. Bali.