İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 497 Hüküm no: 381 Orijinal metin no: [120b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sofular Camii imamına meşrut arsaya yapılan odanın inşa masrafının ödenmesi Husûs-ı âti’l-beyânın mahâllinde ketb ü tahrîri bâbında fermân-ı âlî sâdır olmağın imtisâlen leh kıbel-i şer‘-i mutahharadan keşif nâibimiz olan Abdullah Efendi b. Ali irsal olunup ol dahi hâssa mi‘marlardan Ali Halîfe b. Abdullah ve Osman Halîfe b. Abdülmennan ile mahmiye-i İstanbul Abdullah Ağa mahallesinde vâki‘ tevliyet ve gallesi Sofular Câmi‘-i şerîfinde imâm olanlara meşrûta [121a] olup bir tarafdan Halil Çelebi mülkü ve bir tarafdan tarîk-i hâs ve bir tarafdan tarîk-i âm ile mahdûd vakıf menzile varıp zeyl-i vesîkada muharrerü’l-esâmî ve ebniye ve sukūf ahvâline ıttılâ‘-ı tâmmı olan bî-garaz Müslimîn mahzarlarında akd-i meclis-i şer‘-i şerîf eyledikte menzil-i mezbûra icâreteyn-i ma‘lûmeteyn ile mutasarrıf olan işbu râfi‘ü’l-kitâb Mehmed b. Yusuf nâm kimesne meclis-i ma‘kūd-ı mezbûrda hâlâ câmi‘-i şerîf-i mezkûrda imâm olan Abdüllatif b. Halil nâm kimesne muvâcehesinde takrîr-i kelâm ve bast-ı merâm edip menzil-i mezkûrun ebniyesi bin yüz beş senesinde vâki‘ harîkde muhterika olup arsa-i sırfa kalmağın cânib-i vakf-ı mezbûrda dahi binaya müsâ‘ade olmamağla kendi malımla ihdâs edeceğim ebniye mülküm olmak üzere mütevellî-i mezbûr Abdüllatif Efendi bana izin vermekle ben dahi ber-vech-i mübeyyen arsa-i mahdûde-i mezkûre üzerine kendi malımla mülküm olmak üzere bir bâb oda binâ etmişidim. Hâlâ kıbel-i şer‘den keşfolunup masrûfum tahmîn-i sahîh [ile] tahmîn ve hüccet olunmak matlûbumdur dedikte gıbbe’t-tasdîk mi‘mârân-ı mezbûrân menzil-i mezbûrun ebniyesini bi’l-müvâcehe misâha eylediklerinde tûlen on iki ve arzan yedi bi-hesâb-ı terbî‘ seksen dört zirâ‘ sakfının zirâ‘ı kırkar akçeden üç bin üç yüz altmış akçe ve bi-hesâb-ı mezbûr elli bir zirâ‘ dolma duvar zirâ‘ı otuz beşer akçeden bin yedi yüz seksen beş akçe ve çıkrıkçı işi çam tahtası kapaklı beş aded pencere her biri yüz ellişer akçeden yedi yüz elli akçe ve bir musandıra dört yüz akçe ve sekiz zirâ‘ raf seksen akçe ve bi-hesâb-ı mezbûr yirmi beş zirâ‘ ağa tahtası döşeme zirâ‘ı kırkar akçeden bin akçe ve bir sade oda kapısı yüz elli akçe ve bir sokak kapısı beş yüz akçe ki min-haysü’l-mecmû‘ sekiz bin kırk beş akçe ile ancak olur noksan ile olmak mümkün değildir deyü mi‘mârân-ı mezbûrân ile Müslimûn-ı mezbûrûn icmâ‘ ve ittifâk etmeğin vâki‘ hâli mevlânâ-yı mezbûr mahâllinde tahrîr ma‘an ba‘s olunan Mehmed b. İbrahim ve Ömer b. Ahmed ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 20 min-Recebi’l-mürecceb li-sene [1]107 Şuhûdü’l-hâl; Mehmed Efendi b. Abdülhak, Mustafa Efendi b. Mehmed el-imâm, Mehmed Bey b. Abdüllatif, Abdi b. Süleyman. Mehmed b. Bâyezid.