İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 498 Hüküm no: 382 Orijinal metin no: [121a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali Ağa’nın boşadığı karısı Fâtıma Hatun’dan olan çocuğuna ve çocuğuna bakacak kölesi Daye Kalender’e ödeyeceği günlük beşer para nafakanın kayıt altına alınması Husûs-ı âti’z-zikrin mahâllinde ketb ü tahrîri içün savb-ı şer‘den bi’t-taleb irsâl olunan Ebu Bekir Efendi b. el-Hâc Abdülkerim tüccâr-ı zevi’l-iktidârdan el-Hâc Ali Ağa b. Receb’in mahmiye-i İstanbul’da Ayasofya-i Kebîr kurbünde Acem Ağa mahallesinde sâkin olduğum menzile varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûr el-Hâc Ali Ağa’nın ber-vech-i menkûha-i mutallakası olup zâtını ma‘rifet-i şer‘iyye ile ârifân mahmiye-i mezbûrede Bostancıbaşı Ali Ağa Mahallesi sükkânından Ahmed Efendi b. Mustafa ve Kasap Mustafa Çelebi b. Hüseyin ta‘rîfleriyle mu‘arrefe olan Fâtıma Hatun bt. Çelenk Mehmed Ağa meclis-i ma‘kūd-ı mezbûrda zevc-i mutallakı el-Hâc Ali Ağa mahzarında bi-tav‘ihâ ikrâr-ı tâm ve takrîr-i kelâm edip zevcim mezbûr el-Hâc Ali Ağa târih-i kitâb günü beni bâyinen tatlîk etmekle mezbûrun firâşından hâsıl ve benden mütevellid bi hakkı’l-hıdâne hucr ve terbiyemde olan sadrî sagīr oğlu işbu Mustafa’nın ancak nafakası için ve mezbûr el-Hâc Ali Ağa kendinin câriye-i memlûkesi olup sagīr-i mezbûra hizmet içün emâneten bana def‘ u teslîm eylediği Dâye Kalender’in dahi nafakası’çün el-Hâc Ali Ağa kendi rızâmla cem‘an beher yevm beşer para nafaka ta‘yîn ve takdîr edip meblağ-ı mezbûr yevmî beşer parayı istidâne ve sagīr-i merkūm Mustafa ile câriye-i mezbûre Kalender’in nafakalarına harc ve sarfa ba‘dehû kendüye rücû‘a bana izin vermiştir. Hâlâ suâl olunup takrîri tahrîr olunmak matlûbumdur dedikte gıbbe’s-suâl mezbûr el-Hâc Ali Ağa cevâbında fi’l-hakīka kazıyye vech-i muharrer üzere olup oğlum sagīr-i mezbûr Mustafa ile câriyem merkūm Kalender’in nafakaları’çün târih-i kitâbdan beher yevm beşer para nafaka ta‘yîn edip meblağ-ı mezkûr yevmî beşer parayı istidâne ve sarfa ba‘dehû bana rücû‘a mezbûr Fâtıma Hatun’a izin verdim dedikde vâki‘ hâli mevlânâ-yı mezbûr Ebu Bekir Efendi mahâllinde ketb ü tahrîr edip ba‘dehû ma‘an ba‘s olunan Ali Ağa b. Mehmed ve Mehmed b. Receb ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 18 Zilhicce sene [1]107 Şuhûdü’l-hâl: Fahrü’l-akrân Ali Ağa Kethudâ-i Bevvâbîn-i Hazret-i Kāimmakām Paşa, Umdetü’l-Ulemâ Abdülvehhab Dersi‘âm, Abdülaziz Efendi b. Süleyman imâm-ı mahalle-i mezbûr, Mustafa Efendi b. Mehmed, diğer Mustafa Efendi b. Mehmed, Müstecâb Efendi b. Şaban, Hasan Efendi b. Mehmed el-kadı, Hüseyin Efendi b. Rasûl, Hasan Efendi b. Rasûl, [121b] Mehmed Ağa b. Ali Efendi, Abdülkadir Çelebi b. Ebûbekir, Şaban Çelebi b. İbrahim Müezzin-i Ayasofya, Halil Çelebi b. Hüseyin, Hüseyin Çelebi b. Ali el-müezzin, Monla Ahmed b. İbrahim el-müezzin, Ali Çelebi b. Mehmed el-kayyûm, Mehmed Ağa b. Hasan, Kasab Mustafa Çelebi b. İbrahim, Mehmed Efendi b. Mustafa el-vekîl.