İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 499 Hüküm no: 383 Orijinal metin no: [121b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali Ağa’nın hamile olan boşadığı karısı Fâtıma Hatun’a nafaka ödemesi Husûs-ı âti’z-zikrin mahâllinde ketb ve tahrîri içün savb-ı şer‘-i enverden bi’t-ta‘yîn irsâl olunan Ebûbekir Efendi b. el-Hâc Abdülkerim tüccâr-ı zevi’l-iktidârdan el-Hâc Ali Ağa b. Receb’in mahmiye-i İstanbul’da Ayasofya-i Kebîr kurbünde Acem Ağa mahallesinde sâkin olduğu menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûr el-Hâc Ali Ağa’nın zevce-i menkûhası olup zâtını ma‘rifet-i şer‘iyye ile ârifân mahmiye-i mezbûrede Bostancı Başı Ali Ağa mahallesi sükkânından Mehmed Efendi b. Mustafa ve kasap Mustafa Çelebi b. Hüseyin ta‘rîfleriyle mu‘arrefe olan Fâtıma Hatun bt. Çelenk Mehmed Ağa meclis-i ma‘kūd-ı mezbûrda zevc-i mutallakı işbu râfi‘u’l-kitâb mezbûr el-Hâc Ali Ağa mahzarında ikrâr-ı tâm ve takrîr-i kelâm edip zevcim mezbûr el-Hâc Ali Ağa târih-i kitâb günü beni bâyinen tatlîk etmekle mezbûrun firâşından hâlâ hâmil olup vaz‘-ı haml ve iddetim munkazıye oluncaya değin nafaka-i iddet ve meûnet-i süknâm içün bi’t-terâzî ta‘yîn olunan yevmî otuzar sağ akçeden mâ‘adâ zimmetinde mütekarrir ve ma‘kūdun aleyh olan beş yüz kuruş mehr-i müeccelimi ve kendi mülküm olan melbûsât ve mefrûşât ve celî ve gayr-ı celî ve evânî-i nühâsiye ve gayr-ı nühâsiye ve bi’l-cümle mezbûrun menzilinde mevcûd ism-i mâl ıtlâk olunur eşyâmı bi’t-tamam ahz u kabz ve teslîm edip hukūk-ı zevciyete ve târih-i kitâba gelince beynimizde cereyân eden sâir ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvî ve muhâsamât ve eymân ve mütâlebâtdan ben mezbûr el-Hâc Ali Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt edip mezbûr el-Hâc Ali Ağa dahi hukūk-ı zevciyete ve târih-i kitâba gelince beynimizde cereyân eden sâir ahz u i‘tâ ve hukūk-ı ma‘lûme ve mechûleye müte‘allik âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi min-ba‘d hukūk-ı zevciyete ve târih-i kitâba gelince birbirimiz ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î vâki‘ hâli Mevlânâ-yı mezbûr mahâllinde ketb ü tahrîr edip ba‘dehû ma‘an ba‘s olunan Ali Ağa b. Mehmed ve Mehmed Çelebi b. Receb ile meclis-i şer‘a gelip alâ vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene seb‘a ve miete ve elf. Şuhûdü’l-hâl: Şâhidûne’s-sâbıkūn.